Na ocasion di Dia di Prensa nos ta haya e momento oportuno pa nos para keto un rato y reflexiona riba e importancia di e trabou cu prensa ta eherce. E rol importante cu prensa tin pa cu e comunidad den cua e ta funciona.
Aki na Aruba, cu nos ta bibando den un estado di derecho democratico, e rol di prensa ta hopi importante. E ta importante pasobra e libertad di expresion ta un derecho humano fundamental, cu ta para den articulo 19 di e Declaracion Universal di Derecho Humano. Cu esaki ta wordo bisa cu e medionan di comunicacion y periodistanan tin e papel clave pa garantisa transparencia y responsabilisacion (dunamento di cuenta) di autoridadnan publico y gubernamental. Importante den tur esaki ta, cu no solamente prensa tin e libertad di expresion, pero nos como ciudadano tambe por usa nos bos pa opina na un manera constructivo kico ta bay bon y kico mester di mehoracion.
Un di cuatro poder di democracia?
A base di nos structura democratico cu ta parti den 3 tipo di poder, esta e poder legislativo, e poder ehecutivo y e poder hudicial, kisas ta e momento cu nos na Aruba lo tin cu analisa y evalua e opcion cu lo por agrega un di cuatro poder, esta e poder di prensa na nos structura democratico. Cu e poder di prensa aki banda di e tresnan existente, prensa ta haya e reconocimento y lugar adecua pa su papel di contribui na e conocemento, consciencia y desaroyo di cada ciudadano. Pero tambe pone den perspectiva y cu wowonan critico e realidad di e pais.
Kico ta e mira pa futuro pa prensa local?
Mirando e desaroyonan tanto global como local, nos prensa tambe a pasa den diferente transformacion den e mundo di medio di comunicacion durante epocanan. Sinembargo, prensa na Aruba semper a sa di reinventa su mes y duna tur lo posibel di su banda. Pero a pesar di e cambionan y di sa di adapta, tin preguntanan cu ta esencial pa debati y combersa cu prensa tocante esakinan. Algun pregunta lo por ta:
- Cu e tecnologia innovativo di awendia, kico lo nos por spera di nos prensa local aki 5 pa 10 aña?
- Kico prensa mes ta opina di funda un scol di periodismo na Aruba?
- Con prensa den su totalidad ta pensa di introduci un codigo di etica di periodismo?
- Prensa local lo ta cla pa introduci y carga un ‘mediawet’?
Ta pensamentonan distinto y critico cu lo aporta na y fortifica prensa local pa sigui eherce e trabou importante cu nan ta desplegando ya pa decadanan.
Felicitacion y gradicimento
Por ultimo Hoek y demas coleganan di fraccion di MEP ta felicita prensa riba su dia y gradiciendo pa e colaboracion, critica constructrivo y sosten cu semper a sa di brinda na Parlamento di Aruba, tur instancianan y comunidad henter.