“Hilario, abo semper ta busca e otro banda di medaya, semper bo ta busca e berdad y no ta publica un banda so”
ORANJESTAD- Dia 1 di September, mundo ta celebra Dia di Prensa. E aña aki, Gobierno di Aruba a tuma e decision pa dedica e dia special aki na señor Hilario Doncker kende, durante 24 aña ta trece informacion pa nos comunidad.
Diahuebs 1 di september, despues cu Minister di Finansa Xiomara Maduro a anuncia cu pa prome biaha den 15 aña Presupuesto di nos pais a wordo entrega na tempo, esnan presente, especialmente señor Hilario Doncker a wordo sorpresa cu un video di Prome Minister Evelyn Wever-Croes kende a dirigi e siguiente palabranan na señor Doncker.
“Hilario, awe riba Dia di Prensa, mi kier informa bo cu Gobierno di Aruba a tuma e decision cu nos ta dedica e dia di awe cu ta Dia di Prensa, na bo persona.
Pa prome, pa reconoce bo 24 añanan den prensa cu ta hopi tempo, pero mas aun pa e forma cu bo ta desplega bo trabou. Semper bo tey durante e conferencianan di prensa. Nos a conta cu den e sala aki bo tabata tey mas di 200 biaha. Bo ta e periodista cu mas ta acudi na nos conferencianan di prensa.
Hilario, abo semper ta busca e otro banda di medaya, semper bo ta busca e berdad y no ta publica un banda so y esey ta algo cu nos como Gobierno ta aprecia y nos ta reconoce bo p’e.
Mas aun, semper bo ta respetuoso, semper na tempo pero e pasion y amor cu bo tin pa bo San Nicolas ta locual awe mi kier felicita bo y reconoce bo p’e. Mi ta spera cu e reconocemento aki por inspira bo y inspira bo coleganan den prensa pa sigui semper busca e berdad, busca e otro banda di medaya.
Hilario, masha pabien, masha danki p’e 24 añanan aki den prensa pa trece informacion pa comunidad y cu Dios bendiciona bo”.