Home Politics Minister Xiomara Maduro a haci apertura di Radio MAS FM 105.1

Minister Xiomara Maduro a haci apertura di Radio MAS FM 105.1

SHARE

 

 

Diamars atardi Minister Xiomara Maduro tabata tin e placer di haci apertura oficial di e radio mas nobo aki na Aruba MAS FM 105.1. Den presencia di propietario Sr. Norben Giel, staf di locutornan, Pastor Jairo Maduro y invitadonan, e mandatario hunto cu e hobencito di 5 aña Audrich Chong a corta e sinta pa asina oficialmente Radio MAS FM 105.1 keda inaugura na su studio na Sabana Blanco. 

Minister Maduro a expresa palabra di pabien y exito na Sr. Norben Giel y henter e staf di MAS FM 105.1, un soño di Norben Giel for di chikito y cu a bira realidad despues di e traha hopi duro pa por yega na su meta. Aki bo ta mira cu ora cu bo pone un meta bo dilanti y bo traha cu dedicacion, bo ta logra bo meta. Minister den su discurso a trece dilanti cu radio ta un medio pa informa, educa y deleita nos comunidad, ademas ela expresa exito na tur esnan cu lo ta tras di e microfono pa nan eherce e trabao cu pasion, responsabilidad y profesionalismo. E mandatario como minister di Cultura a haci un apelacion na e staf di locutornan di MAS FM 105.1 pa promove produccionnan di nos artisa y musico local pa asina nos comunidad y turista por conoce mas y disfruta di nos cultura.