ORANJESTAD – Awe mainta Alvin Howell (49) y Jacqueline van Putten (61) a presenta dilanti Hues, pa e caso penal cu Ministerio Publico a cuminsa contra nan.
ARUBANATIVE por a compronde cu despues di un discusion entre abogado mr. Canwood y Fiscal, Hues a dicidi di honra e peticionnan di mr. Canwood cu ta encera cu 6 testigo promer y ayera 2 mas lo wordo interoga. Entre e testigonan ta wordo menciona Marisol Lopez Tromp, kende tabata forma parti di partido POR.
DESFALCO DI MAS CU 200 MIL FLORIN
Hues a informa cu e caso no ta wordo trata sino ta un “regie zitting”. Fiscal a acusa Howell y van Putten cu den e periodo di 2017 y 2021, nan lo a haci desfalco di placa di e partido POR. E temporada ey Howell tabata Parlamentario y president di e Stichting mientras cu van Putten tabata e secretaria di e Stichting.
Fiscal ta sospecha cu Howell a haci desfalso di 179.404 florin y haci falsificacion di recibonan. Fiscal a bisa cu ta sospecha van Putten di desfalco di algo mas di 100 mil florin.
Howell a wordo representa pa mr. Canwood mientras cu van Putten a wordo representa pa mr. Arendsz Marchena.
PIDI PA SCUCHA TESTIGO
Abogado mr. Canwood a bisa Hues cu anterior el a pidi pa scucha 6 testigo pero un rato promer cu e caso e tabata papia cu Howell y a bin 2 testigo mas aserca. Pues en total el a bira 8 testigo. Entre nombernan cu a wordo menciona, esun cu a resalta mas tabata Marisol Lopez Tromp. Mr. Canwood a bisa cu tur e testigonan por splica cu no tabatin desfalco y cu Howell a paga personanan pa nan servicio pa cu partido POR. Mr. Canwood a bisa Hues cu awor a pidi tambe pa scucha Marisol Lopez Tromp kende por splica kico tabata e intension di placanan cu a haya pa e Stichting. Segun e abogado, Marisol Lopez Tromp tambe a ricibi placanan y a usa placanan. E kier pa Marisol Lopez Tromp splica con tabata usa placanan y cu no tin nada di desfalco.
Abogado Arendsz Marchena a bisa cu e ta apoya e peticion pa scucha Marisol Lopez Tromp, kende por splica con e placanan a wordo usa y con van Putten tabata haci su trabaonan.
REACCION FISCAL
Fiscal ta haya cu no ta relevante pa scucha Marisol Lopez Tromp pasobra tur e descripcion di Stichting ta riba papel caba.
Fiscal tambe a bisa cu diferente di e testigonan no ta relevante pa scucha. El a bisa cu e lo por bay di acuerdo pa scucha 4 di e testigonan y pa laga Landsrecherche interoga nan.
REACCION DI ABOGADO
Abogado Canwood ta contra e proposicion di Fiscal pa laga Landsrecherche interoga e testigonan. El a cuestiona e forma di interogacion di Landsrecherche y a bisa Hues cu e kier pa Hues Comisario haci e interogacion. E abogado a para riba pa scucha Marisol Lopez Tromp pasobra e tabata ricibi placanan y e por splica esaki.
E abogado tambe a mustra cu el a bay haci investigacion cu Landsrecherche a keda sin haci. El a haya copia di whatsapp entre Howell y un periodista B. pa demostra cu no tabatin nada di desfalco. Tambe e abogado a bisa cu el a haya copia di accountant di POR.
DECISION HUES
Hues a pospone e caso un rato pa bay pensa y a bolbe pa tuma decision. Hues a dicidi cu pa otro siman mas laat Diahuebs , mr. Canwood mester entrega tur e documentonan cu e abogado a bisa cu e tin. Hues a aproba tur peticion. Tur lo wordo interoga door di Hues Comisario.