Ta conoci cu 99% di abuso sexual di mucha, e abusador ta famia of conoci. Un persona hopi yega na e famia cu e mucha ta confia. Personanan cu mayornan ta confia cu e cuido di nan yiunan. Pa nos combati e crueldad enorme aki contra un mucha, nos tur mester haci’e. Nos por cuminsa pa evita 99% di e casonan aki door di wak miho cu kende nos ta laga nos yiunan y reconoce señalnan den e mucha of den esnan cu ta wak pa e mucha.
Gabinete Wever-Croes I y II, a bin ta trahando constantemente riba leynan y proceduranan pa percura pa castigonan hopi mas severo pa abusadonan. Pero tambe riba prevencion y educacion, cu ta hopi importante. Enfaticamente Prome Minister a expresa di ta condena abuso sexual di mucha y desde su entrada den politica na 2009, el a uni na e causa aki participando na tur marcha pacifico cu tabata tin desde e tempo ey pa e tema aki. Na e comienso di Gabinete Wever-Croes, mesora a nota cu mester a pone prioridad na e veld social, pa cua motibo tambe mesora a cuminsa traha riba e problematica aki.
Minister di Husticia y Asuntonan Social, señor Rocco Tjon, a informa riba e accionnan cu Gabinete Wever-Croes a tuma contra abuso sexual di menor riba e terenonan di Prevencion, Cuido di victima, Investigacion y Castigo.
PREVENCION
- Meldcode / Codigo di protecion / Signs of safety.
- Family Justice Center / Cursonan pa ful e veld social door di European Family Justice Alliance.
- Campaña nacional ‘Mi Mesun Heroe’.
CUIDO DI VICTIMA
- MOU entre ful e cadena, caminda ta garantisa cuido psicologico pa e victima y tambe un
psicologo pa guia e interogacion. Di e forma ey e caso cu ta wordo presenta ta mas solido.
- “Vertrouwensarts”, medico forensico a wordo apunta y ta specialisando den e materia.
INVESTIGACION
- Certificacion di zedenrechercheurs y psicologonan pa studioverhoor di menornan
di edad.
- A busca tur material nobo pa aregla e studioverhoorruimte.
- Guia nobo pa maneha casonan di agresion sexual di parti OM.
- Preparando introduccion di ‘recherche psycholoog’.
CASTIGO
- Castigo maximo a wordo hisa na 2020.
- Delito sexual no ta caduca. No ta importa cuanto tempo pasa, si tin prueba, e abusado lo haya su castigo.
CAMPAÑA NACIONAL ‘MI MESUN HEROE’
Diaranson 31 di augustus anochi, e Campaña nacional ‘Mi Mesun Heroe’ lo inicia su prome episodio na TeleAruba. E Proyecto aki ta conta cu 52 episiodo educativo pa nos muchanan pero sigur tambe pa nos mayornan.
PRIORIDAD NUMBER UN
E problematica aki ta prioridad number un desde di inicio di gobernacion di Gabinete Wever-Croes y ta keda e prioridad number un tur dia pa percura pa nos muchanan wordo protehi. Pasobra nos muchanan ta mira riba adultonan pa protehe nan pa cua motibo Gobierno ta pone esaki como prioridad hopi halto riba agenda den gobernacion. Cu stapnan firme y sigur, nos ta conbati e problema di abuso di menor.
“E realidad di e percentahe di abuso di menor, 99% di abuso sexual di mucha, e abusado ta famia of conoci, ta alarmante. Pero e ta un indicacion fuerte cu banda di leynan, nos mester cuminsa enfoca mas den e famia. Gobierno a y ta haci di su parti. Pero cada ciudadano mester duna di su banda. Prevencion ta den bo man!”,Prome Minister Evelyn Wever-Croes a duna di conoce.