Home Corte Parkietenbos

Parkietenbos

SHARE

 

Riba 29 di augustus Corte Comun di Husticia a rechaza un keho di un habitante di Parkietenbos. E habitante a keha (entre otro) tocante e decision di Ministerio Publico pa no persigui e hecho cu e incinerator a sigui ta traha y tambe encuanto e decision pa no persigui, pa awor, e hecho cu no tin hindervergunning pa Parkietenbos. Ademas Corte Superior a rechasa e keho di e habitante tocante e decision di OM di keda sin persigui y di no trata denuncianan posteriormente haci di otro hechonan castigable.

Relaciona cu e incinerator, Corte Superior a referi na e hecho cu un hindervergunning a wordo saca y cu huez a dicidi cu no tin base pa suspende e hindervergunning aki. A base di esey no por conclui cu a base di e hechonan y circumstancianan actual, tin motibo pa sospecho di un hecho castigable. Ademas Corte Superior ta considera di importancia cu e lucha contra e hindervergunning ta un asunto civil y no penal. 

Ministerio Publico a informa e habitante na inicio di e aña aki den un conversacion personal cu e decision di persigui of no persigui hechonan relaciona cu Parkietenbos lo wordo hala te januari 2023. Esaki ta pa duna Pais Aruba tempo pa introduci medidanan pa pone e dump riba Parkietenbos cumpli cu leynan y reglanan. Corte Superior ta di opinion cu e decision aki di Ministerio Publico no ta igual cu keda sin persigui un hecho castigable of cu tarda demasiado pa persigui un hecho castigable. Riba e punto aki e keho di e habitante a wordo declara sin base. 

E decision di Corte ta significa cu Ministerio Publico lo huzga e situacion rond di Parkietenbos na januari 2023 di nobo, manera publica anteriormente.