Proyecto ta keda cla pa november proximo y e scol por muda bek den nan edificio completamente renoba.
ORANJESTAD: Recientemente Minister Endy Croes a haci un bishita na St. Aloysius School na Noord pa wak con e trabounan di contruccion ta bayendo pa cu renobacion di dicho scol. Na luna di april por medio di conferencia di prensa e mandatario di enseñansa a presenta oficialmente e proyecto di renobacion di St. Aloysius School.
Minister Endy Croes a expresa di por tuma nota di cu e proyecto ta avansando. E banda panort ta hopi avansa. Un total di diesdos klas lokaal ta wordo renoba ful modernisa. E otro banda di e scol a cambia ful e dak y esaki tambe ta casi cla. Nos por a mira cu e oficinanan y biblioteca ta den pleno renobacion. E bañonan a wordo aloca pa un otro luga y nan ta trahando riba esaki. Tambe lo bin un pos completamente nobo. Den e skina banda pabou lo bin e gymzaal.
E mandatario a expresa di ta hopi contento con e trabounan ta bayendo. Como tambe e dignatario a informa cu a papia cu esnan encarga y nan a splica cu nan ta trahando den e tempo stipula. Pa luna di november proximo e proyecto lo wordo entrega. E parti di e speelplaats ora cu awa yobe semper e scol tabatin problema cu e awa ta keda para den e luga. Minister Endy Croes a splica cu su persona tabatin combesacion cu DOW, cu nan lo renoba e speelplaats completo. E mandatario a enfatisa cu ohala pa e aña aki 2022 St. Aloysius School por wordo entrega completamente renoba, modernisa na unda cu e docente y alumnonan por bin nan cas original bek. Finalisando Minister Endy Croes ta contento y ta keda monitor e renobacion pa asina por entrega pronto e bunita trabou.
