Home Police Dama chauffeur burachi deteni, despues di a ocasiona accidente na Shaba

Dama chauffeur burachi deteni, despues di a ocasiona accidente na Shaba

SHARE
Shaba – Diabierna atardi polis a bay poco pura ariba e caminda di Shaba, unda a sosode un accidente di trafico entre 3 auto y tin hende herida.

Na yegada di prome unidad di polis nan a compronde cu tawata trata di un criatura di 4 aña.
E mucha lo a haya sla na cara y tawata sangra for di su nanishi y mesora a pidi pa ambulance.

Manera nos a bisa caba tawata trata di tres auto, un auto di carga cu tawata esun mas dilanti, un Chevrolet Aveo y mas patras un BMW maneha pa un dama.

Na e sitio nos a compronde cu e BMW lo no a regula su velocidad y bay dal tras di e Aveo, e Aveo na su turno a bay dal contra e truck di compania. E criatura tawata den e Aveo.

Polis na su yegada a dicidi pa test e dama di e BMW pa alcohol, pero esaki tawata dificil pa e dama y eynan mes e la wordo deteni pa core auto burachi.

Paramediconan cu a yega a controla e mucha na e sitio, despues a transporta e mama y e mucha pa Hospitaal pa tratamento avansa.