ORANJESTAD – Minister di Turismo y Salud Publico Sr. Dangui Oduber tabata di bishita awe mainta na Hyatt Regency Aruba Resort & Casino. Algun tempo atras e mandatario a cuminsa bishita hotel nan rond di Aruba pa asina informa su mes tocante e desaroyonan y cambionan cu tin den e sector di turismo y tambe pa informa y comparti informacion tocante e vision di e mandatario pa cu esaki.
Minister Oduber ta splica cu durante e bishitanan aki e hotelnan tin e oportunidad pa papia tocante nan vision, strategia, y tambe kico nan ta premira pa e proximo tempo. Awe e la topa cu e Gerente General di Hyatt Regency, Sr. Gabriel (Gabe) Castrillon, tambe cu Sra. Oriana Bronstein (Director of Rooms) y Sra. Gerladine Coutinho (Director of Sales & Events). E tabata un bishita hopi fructifero caminda cu a intercambia ideanan. E mandatario ta bisa cu “Tabata hopi bunita pa combersa cu e dos empleado Arubano nan aki cu tin mas cu 20 y 30 aña trahando na e hotel y pa mira con nan a desaroya nan mes den un compania internacional manera Hyatt Regency”.
Durante e bishita a haña un recorido caminda cu por a mira e cambernan, area recreativo, e poolnan, y e restaurantnan. Hyatt Regency a inverti un suma substancial y compromete nan mes pa haci inversionnan den cuadro di mehoracion di nan propiedad y calidad. Nan tin un pool nobo exclusivamente pa adulto cu tin cabana cual ta ofrece diferente tipo di tratamento corporal, un servicio cu ta wordo pidi den demanda halto door di e turista nan. Tambe nan ta partner cu artista nan local pa crea muebles y decoracion pa e hotel. Den nan biblioteca nan ta purbando di pone mas buki di Aruba, y tambe nan restaurant Ruinas del Mar ta den proceso di renobacion cu e vision cu e lo ta un replica di e ruina na Bushiribana. Tur esaki ta coherente cu e vision di ministerio di Turismo pa duna mas balor na e turista cu ta inverti den Aruba y tambe pa hisa e calidad di nan experiencia ora cu nan ta di bishita.
E mandatario a indica tambe cu e lo sigui bishita mas hotel rond di Aruba pa asina keda al tanto di tur locual ta pasando den e sector di hospitalidad y tambe pa por comparti diferente ideanan y vision pa keda trese inovacion y mehora e calidad di nos producto Aruba.