Poco poco e “Campaña 3C” di Archivo Nacional Aruba (ANA) ta yegando su fin. Tabata comienso di luna di juni, unda hunto cu Minister di Cultura sra. Xiomara Maduro, Archivo Nacional a lansa su “Campaña 3C” y cu mediano juli a wordo prolonga cu 6 siman mas.
3C, cu ta wordo pronuncia TRECE, ta para pa COLECTA, CONOCE y CONSERVA! Cu e “Campaña 3C” aki Archivo Nacional, sosteni pa Ministerio di Cultura, kier a conscientisa nos comunidad riba e importancia pa nos conserva nos historia dor di trece materialnan historico cu ta bira parti di nos herencia cultural y nacional na ANA pa asina, no solamente amplia nos conocemento historico y cultural di nos pais, sino tambe pa warda esakinan pa futuro generacionnan.
Pues pa e campaña aki ta dirigi pa ANA COLECTA materialnan historico den forma di documento, potret, materialnan audio-visual y digital y obhetonan cu tin un historia y cu por ta di importancia pa nos historia nacional. Di e manera aki nos como comunidad por CONOCE y compronde nos historia mihor y yena buraconan cu por tin den nos historia
oficial, y cu por sirbi pa amplia nos conocemento di historia di nos Aruba. Di e manera aki tambe nos ta duna nos granito de arena pa asina hunto nos CONSERVA historia y cultura di Pais Aruba pa futuro generacionnan. Asina tambe futuro generacion por tin informacion di kico tur a pasa na Aruba y con nos a biba aki na Aruba. Mescos cu otronan prome cu nos a percura pa warda informacion cu awe nos por sa kico a pasa den pasado, asina tambe nos tin e obligacion pa documenta nos historia pa futuro generacionnan. Manera ex Archivista General di Hulanda Engelhard a yega di bisa, “Loke nos warda ta determina e imagen cu futuro generacionnan lo tin di nos tempo. Scoge kico pa warda pa un futuro desconoci ta un tarea fascinante y responsabel, pero no ta uno facil.”
Pesey un biaha mas Archivo Nacional kier recorda un y tur, pa haci entrega di loke por ta valioso pa nos historia. Tira bista na momento cu sernan keri fayece y di un of otro forma a colecta informacion, potretnan etc, cu por ta descriptivo pa nos historia, y no basila pa trecenan ANA.
ANA kier a gradici e diferente personanan y instancianan cu ya caba a entrega material na ANA. Danki di curazon pa e bunita gesto aki. Den e materialnan nos por conta cu documento, publicacionnan tanto imprimi como tambe digital. Diferente recortenan di
corant, archivonan di instancia priva y servicionan di gobierno, potret, video, pintura, posters, mescos di cassette di entrevistanan di programa na radio.
Hefe di ANA
drs. Raymond R. Hernandez