ORANJESTAD, 24 di augustus, 2022: Durante un conferencia di prensa awe tardi Aruba Bank a anuncia nan di 16 edicion di e anual “Aruba Bank Walk & Run 2022”, conhuntamente cu su partner Subway, IBiSA, y Patrishi Sports. Despues di un ausencia di 2 aña di e evento aki, Aruba Bank Walk and Run tey bek.
Tawata nos intencion pa nos di 16 evento na 2020 bira e “Walk & Run for the Roses” y yuda sostene Koningin Wilhelmina Kanker Fonds pa por sigui cu nan meta di prevencion di Cancer y yuda patient cu Cancer na Aruba. Door di e pandemia, nos no a logra pa organisa e evento, pero si a haci e donacion na e fundacion. E aña aki, nos ta logra introduci nos di 16 walk and run bou e nomber “We Rose Together”, na memoria di esnan cu a perde bataya Cancer. Cada 5 florin di registracion lo wordo dona na Koningin Wilhelmina Kanker Fonds.
Na 2019 e evento a sell out den menos di 1 ora, pues ta pone enfasis pa tur esnan interesa pa participa den e Walk and Run cu registracion ta habri 12 di September pa exactamente 9’or di mainta. Un biaha mas lo habri registracion pa e prome 2500 participantenan cu registra.
Participacion ta AWG 25 pa tur 4 dia. Tur participante ta ricibi 1 dri-fit shirt, un drifit towel, un backpack, y nan BIB cu chip. Nos ta conseha tur hende pa paga nan cupo mesora y garantisa su participacion. Por paga via Aruba Bank Online y nos Aruba Bank App. Esaki ta solamente pa clientenan di Aruba Bank. Otro participantenan cu no tin Aruba Bank Online, por haci uso di e facilidad di Credit card payment obtenibel ariba e pagina di registracion. Y, mescos cu tur anja, por paga na IBISA su oficina na Frankrijkstraat of San Nicolas, usando e machin di swipe di Aruba Bank. Nos no ta acepta cash.
Manera e ultimo dos añanan e App di e evento y nos website www.arubabank.com ta bai ta e medionan principal pa registra. Ademas di e “Live tracking” y “Social Share feature”, e App tin lo tin informacion importante pa tur participante tokante reglanan, rutanan, y hopi mas.
Desde añanan anterior e Walk & Run a introduci e concepto di un evento “plastic free”, cual concepto ta mantene pa e evento di 2022 tambe, unda cu durante e rutanan Aruba Bank no lo duna awa den cups di plastic, ni boli y esaki ta en conexion cu e Green Wave efforts. Pues, corda trece bo boter di awa, y bo tin e opcion di refill esaki na Start, Halfway di e ruta, y na Finish, pa asina bo curpa keda hidrata.
Corda marca e fechanan pa e gran evento dianan Dialuna 26, Diamars 27, Diaranson 28 y Diahuebs 29 di September. E caminata y coremento lo inicia pa 6:00pm. E aña aki un bes mas nos lo ta den districtonan di San Nicolas, Bushiri, Paradera y Camacuri. Informacion exacto lo wordo publica ariba e Aruba Bank Walk & Run App, ariba www.arubabank.com y ariba nos Facebook page.
Download e Aruba Bank Walk & Run App nobo, haci esaki awe mes via bo Play store of App store y mantene bo mes prepara y informa di tur detayes di e gran evento aki, organiza pa e comunidad di Aruba.
Aruba Bank kier gradici tur partner cu ta haci e gran evento aki posibel, Subway, KPA, IBiSA y Pastrishi Sports y voluntarionan, y ta conta cu nan sosten un bes mas pa e gran evento di Aruba Bank Walk & Run 2022.
