Home Politics Presidente di Parlamento mr. Edgard Vrolijk den e di cuater edicion di...

Presidente di Parlamento mr. Edgard Vrolijk den e di cuater edicion di “ Presidente ta informa” edicion 4

SHARE

Den edicion 4 y ultimo prome cu Aña Parlamentario lo enfoca riba independisacion, renobacion di edificio di Parlamento y planes pa 2022-2023 .

Falta ainda pa cuminsa e proceso di independisacion y renobacion di edificio di parlamento

Den pasado a cuminsa e proceso di independisacion pero esaki a keda pega. September venidero tin plania pa sinta cu Hulanda y busca e ayudo necesario pa haci e investigacionan necesario y duna e scenarionan cu lo ta miho pa por independisa Parlamento structuralmente. Y unabes cu esaki ta cla, e ta den man di Parlamento pa haci escogencia di e miho modelo y cuminsa e fasenan cu mester ser encamina pa porfin Parlamento por ta independiente. Un otro aspecto cu mi a bin encontra ta un edificio cu mester un renobacion urgente y sperando cu nos por keda cla cu DOW pa nos por bin na remarke na fondo y pa asina na aña 2024 por cuminsa cu esaki.

Planes pa 2022-2023

E prioridad ta pa cuminsa e proceso pa independisacion di Parlamento y termina e procesonan necesario pa por yega na renobacion di Parlamento cu ta exigi hopi di DOW conhunto cu bedrijfsvoering pa por logra keda cla pa por cuminsa cu renobacion di edificio na 2024 sino esaki lo bira 2025. Tin un parti di Parlamento ta den un estado deplorabel unda cu practicamente esaki no ta usabel mas y por forma un peliger pa trahado y Parlamentarionan. Esaki ta pone cu e renobacion ta hopi urgente. Banda di esaki nos por wak e tendencia di ultimo dos eleccion unda cu mas partido politico ta saca asiento y e capacidad actual sin e parti aki di Parlamento, no lo por acomoda mas fraccion cu saca asiento.

Sigur un otro aspecto cu lo sigui explora ta con pa reduci mas gasto entre gastonan di utilidad, pero tambe pa percura pa implementacion di digitalisacion di tur documento pa asina reduci gasto y cu na mes momento ta contribui na nos medio ambiente. Por ultimo un otro punto di atencion pa 2022-2023 y cu ta sumamente necesario ta pa amplia e cantidad di personal na Parlamento.

Pa termina, den corto tempo, cu hopi contratiempo y cu un presupuesto limita a percura pa haci lo maximo pa mehora funcionamento di Parlamento. Mi ta hopi agradecido na e trahadonan di Parlamento cu ta trahando cu alma y cuerpo pa haci esakinan posibel y sigur mi ta gradici nan pa nan confiansa y ta kere den locual tin di ser haci pa Parlamento di Aruba como insituto por sigui engrandece. Den e proximo edicion lo mi sigui informa pueblo un bes pa luna di trabaonan cu Parlamento a bin ta haci.

Pa mas informacion por subi riba Parlamento di Aruba su website na www.parlamento.aw of por bishita nos pagina di Facebook: ‘Parlamento di Aruba”.