Home » Kiwanis Palm Beach a traspasa e programa Stimami Guiami pa Fundacion pa Nos Muchanan

Kiwanis Palm Beach a traspasa e programa Stimami Guiami pa Fundacion pa Nos Muchanan

by Admin
0 comment 141 views

Un programa di educacion pa fortica e base di e relación entre mayor y yiu

Oranjestad – Diamars dia 23 di Augustus, 2022, durante un rueda di prensa a tuma lugar e traspaso oficial di e programa Stimami Guiami di Kiwanis Club of Palm Beach pa Fundacion pa Nos Muchanan.

Stimami Guiami (Stima bo Yiu, Guia bo Yiu) ta un Programa Educativo pa mayor hunto cu nan yiu , unda ta enfoca riba mehoracion di e laso entre e mayor y su yiu y alavez cultiva e desaroyo optimal di e yiu . E programa aki a inicia na 2021 como un colaboracion entre Kiwanis Palm Beach, Stichting Wit Gele Kruis, Tienda di Educacion, Fundacion Pa Nos Muchanan, Fundacion Respeta Mi y Centro pa Hoben y Famia. E programa ta pa mayor den fase di embarazo of cu baby recien naci te cu 4 aña di edad, y ta brinda informacion y sosten den mayoria aspecto di cuido y guia pa yiu durante un fase di desaroyo importante. Na luna di April di 2021 a logra pa inicia e programa cu e prome grupo piloto pa mayor cu yiu di 0 pa 12 luna. E grupo a keda asina entusiasma, cu despues a sigui cu un programa piloto pa mayor cu yiu di 12 pa 30 luna. September venidero ta cuminsa cu un programa piloto pa mayor cu yiu di 30 luna pa 4 anja. Te awor un total di 60 mayor cu nan yiu a pasa door di e programa y a impacta sigur un 150 hende positivamente si nos conta un promedio di 2.5 persona pa famia.

Mirando e feedback positivo di e mayornan participante y e impacto den desaroyo di mucha cu a wordo logra, e partnersnan a refleha riba e futuro rumbo di e programa. E pensamento central tabata cu e programa tin un balor grandi, cu tin cu garantisa e continuidad, y cu tin cu purba di haci’e accesibel, y preferibel pa un grupo di participante mas grandi. Sinembardo, unanimamente a dicidi cu lo ta optimal si e programa wordo hancra den un organsiacion den e sector social y cu capacidad pa carga e parti logistico cu e programa ta demanda. Asina a yega na un acuerdo cu Fundacion pa Nos Muchanan cu lo tuma e encargo di e programa pa futuro. Tambe e otro partners lo duna nan sosten unda cu nan por, en particular den forma di experticio.

E traspaso oficial a tuma lugar na cede di Kiwanis Palm Beach na Neptali Henriquez Park, durante un rueda di prensa unda e diferente partners a expresa nan pensamento riba e programa. Despues di e proyecto piloto, FPNM conhuntamente cu Sra. Roke Hoen lo ofrece un “Train the Trainer Program” pa tur partners colaborando cu e proyecto.

Di parti Kiwanis Palm Beach e coordinador y iniciador di e programa, Sr. Roy Mezas, a expresa cu e nescesidad pa e programa aki a sali for di e “Community Survey” cu Kiwanis Club of Palm Beach a conduci durante e aña 2018 y 2019. Den esaki a señala cu hopi mayor lo aprecia mas guia riba nan tarea den formacion positivo di e yiu durante e prome ananan di bida. Kiwanis Palm Beach a forma un comision cu a explora con por lanta un asina yama “parent education program” y cu asistencia di e experto Sra. Roke Hoen y profesionalnan di Fundacion pa Nos Muchanan, Tienda di Educacion, Fundacion Respeta Mi, Stichting Wit Gele Kruis y Centro pa Hoben y Famia, a logra di diseña un programa segun normanan internacional y strategianan y metodonan basa riba evidencia scientifico, adapta na nos situacion social cultural local.”

Di parti Fundacion pa Nos Muchanan, e director, sra. Natasha Gilkes, a afirma cu for di principio a sostene e iniciativa aki mirando cu e ta hopi alinea na e meta principal di nan fundacion. Asina tambe tabata algo natural pa nan tuma e encargo central awor cu e programa crece for di un iniciativa piloto pa un programa structural.

E siguiente curso lo tuma lugar riba dianan 6, 8, 13, 15, 20 y 22 di september y por inscribi via E-mail: [email protected] di Fundacion pa Nos Muchanan of whatsapp: 699-8900. No tin gasto pa participa na e workshop aki cu ta pa mayornan cu tin yiu entre 30 luna y 4 anja.

Kiwanis Club of Palm Beach ta gradici tur esanan cu di un forma of otro a aporta na Stimami Guiami, un inicativa caritativo hopi importante pa nos comunidad. Especialmente ta gradici tur e organisacionan cu tabata partner den e fase piloto pa nan contribucion importante y valioso, entre nan: Stichting Wit Gele Kruis, Tienda di Educacion, Fundacion Pa Nos Muchanan, Fundacion Respeta Mi y Centro pa Hoben y Famia. E balor di e contribucionan aki tabata indespensabel y di un valor enorme, mirando e experticio educativo, social y profesional cu ta rekiri pa ehecuta e programa aki den un forma responsabel. Danki na e colaboracion aki por a logra e realisacion di e programa.

Kiwanis Palm Beach lo keda duna aporte financiero na e programa Stimami Guimami e proximo añanan cu e fondonan caritativo cu e ta recauda den nos comunidad.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio