Barcadera: Diamars den careda di 12 or di merdia brandweer, polis a bay pa direccion di Barcadera pa un candela enorme na Daltra.
Na yegada a bin compronde cu ta trata di un candela cu a cuminsa cerca di e edificio di Daltra, pero cu despues a expande y tabata menasando e lugarnan den cercania.
Mesora Polis a cuminsa cera e caminda for di e edificio di Arugas y poco mas pabou tambe. Pa asina brandweer por a cuminsa haci su trabou den tur trankilidad. Solamente esnan cu ta trahando den e area aki, polis tabata laga pasa. Mirando cu e candela tabata keda bira mas grandi y un cantidad di mirones tabata trata na yega mas cerca, a dicidi di expande e area cera pa trafico, for di e rotonde di Ser’i Theishi bay zuid. Mirando cu mas sigur lo bay dura basta prome cu brandweer por controla y combati e candela a dicidi di pidi DOW pa pone baricada pa asina e area aki keda cera pa trafico, te ora cu nan caba.
E candela ta riba e tereno di Daltra caminda tin un cantidad di auto bieu, den e autonan aki ainda por tin azeta, acido, brake fluid etc dus cosnan hopi toxico y flammable. Esaki ta haci e huma toxico, cu lo por haci daño na salud di hendem mirando cu pa motibo cu no tin biento e huma no ta bay direcion di lama pero ta bin directo riba tera. E huma ta core di pazuid pa panort y ta pasa memey di nos isla.
Casi tur unidad di brandweer y e Hoogwerker di brandweer ta na e sitio. Tambe brandweer a manda yama tur su personal cu ta na cas pa presenta pa asina yuda combati e candela aki cu sigur ta hopi grandi cu lo por bay dura oranan largo of dia pa paga.
Mobile Truck di Rampenbureau tambe ta na e sitio, e candela aki ta un desaster basta grandi cu por causa hopi daño, na e lugarnan cerca pero tambe na nos miedo ambiente.
E situacion ta birando mas peligroso y segun nos a compronde a evacua esnan cu tabata eybanda, vooral di Arugas. Tur e trucknan di ARUGAS a wordo hala tambe for di e sitio. E trucknan di Arugas cu ta riba caya no ta wordo permiti pa yega bek pero pa e chauffeurnan bay cu nan cas.
Autoridad a cera e area cu un diameter di 500 meter rond di e candela. Nos lo keda pendiente pa mas informacion y imagen.
