Home Local Campaña di Vacunacion Escolar a cuminsa atrobe.  Ta importante pa muchanan...

Campaña di Vacunacion Escolar a cuminsa atrobe.  Ta importante pa muchanan keda proteha contra malesanan contagioso

SHARE

 

 

ORANJESTAD, Aruba –23 di Augustus 2022: Manera tur aña campaña di vacunacion escolar tey atrobe. Seccion Cuido Salud Hubenil (JGZ) di Departamento Salud Publico (DVG) lo pasa tur scol preparatorio, basico y special pa ofrece vacuna na cierto grupo di mucha segun e programa di vacunacion nacional. Ta importante pa keda vacuna muchanan pa asina evita cu otro malesanan contagioso por lanta cabes. Aki ta referi na e vacuna ‘DKTP’ contra difteria, kinkhoest, tetanus y polio, ‘HepB’ contra hepatitis B y ‘MMR’ contra cacheton, sarampi y sarampi Aleman. Tambe lo ofrece vacuna ‘HPV’ contra e virus papiloma humano cu por causa cancer na boca di matris.

 

Cinco grupo di mucha ta bin na remarca pa un of mas vacuna:

Muchanan di scol preparatorio naci te cu 2017 cu falta DKTP / HepB / MMR

Muchanan den klas 1 di scol basico cu falta DKTP / HepB / MMR

Muchanan den klas 5 di scol basico pa refuerso (booster) di DKTP y HepB / MMR si falta

Muchanan naci na 2012 di scol special pa refuerso (booster) di DKTP y HepB / MMR si falta 

Mucha muhenan den klas 6 di scol basico y special HPV (2 dosis)

 

Mayornan cu tin yiu den un di e gruponan menciona lo ricibi un carta cu mas informacion via scol si en caso e mucha falta vacuna segun registracion. Den e carta lo pidi permiso di mayor pa vacuna e mucha na scol. Si tin e buki geel di vacunacion por manda esaki hunto cu e carta di permiso y lo nota esaki den e buki. Si no tin e buki mas, e mucha lo haya un otro comprobante di vacunacion. Seccion Cuido Salud Hubenil ta traha conhuntamente cu Wit Gele Kruis y tin record di vacunacion di tur mucha digitalisa. Asina por garantisa cu tur mucha ta proteha debidamente.

 

Tur mucha tin derecho pa crece y desaroya bon di salud. Cuido y proteccion di nos muchanan ta un responsabilidad di nos tur. Ban percura pa muchanan na Aruba ta bon vacuna!

 

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw