Home Local Proyecto Hunto Grandi, Grandi Hunto cu tremendo clausura di e programa ...

Proyecto Hunto Grandi, Grandi Hunto cu tremendo clausura di e programa Desaroyo continio & Digital

SHARE

 

 

Tawata na 2020 cu e proyecto Hunto Grandi Grandi Hunto, cu cooperacion di Fundacion Movemento ta Bida y subsidia dor di Cede Aruba,  a introduci e programa Desaroyo Continuo & Digital cu ayudo tecnico y financiero di SETAR, despues di un encuesta cu a wordo teni bao di e poblacion di 60+. Den e encuesta cu a sali na cla cu tin basta  necesidad di conosemento di e topico aki.  Principalmente cu durante e pandemia hopi negoshi, e.o. Banconan, Companianan di utilidad, departamentonan di gobierno etc a cuminsa exigi pa pagonan tuma lugar “on line”. E programa a resulta un exito total.

 

Den juli ultimo a caba cu e parti 2 caminda boluntarionan 60+ a sigui un curso di 4 siman duna pa Kimberly Boekhoudt di SETAR pa bira instructor di e programa basico. Den augustus e traspaso pa otronan den bario di Paradera, Brazil, Dakota, Playa Pabou y na Cas di OPPA a sigui pa e grandinan, cual atrobe a resulta un exito rotundo. Bunita di e proyecto aki ta, cu guiadornan di 60+ ta tuma na nan encargo e tarea di instrui otronan tambe di 60+.

 

Diahuebs 18 augustus ultimo a finalisa e curso cu un dia di habilidadnan digital, e tan famosos”Digital Skills Day”, cu ta pa di 2 biaha cu a wordo organisa pa asina otronan cu no a sigui e cursonan den bario, tambe por a haya informacion. E dia a tuma lugar den Cas di Cultura. For di 07:30 ya e prome interesadonan a cuminsa yega y despues di inscripcion, por a pasa busca desayuno.

 

Pa exactamente 09:00, Maestra di Ceremonia sra. Greta Illidge-Paesch, miembro di directiva di Fundacion movemento ta bida, a duna e señal pa apertura oficial  di e dia imporante aki. 

 

A sigui cu presentacion di AZV, Elmar y  un Coffee-Break. Seguidamente  Aruba Bank y Smart System a duna nan charla sigui pa un Lunch-Break. Y por ultimo Save More a  duna su presentacion. Mester remarca cu informacionnan al caso y valioso a wordo duna door cu tur ariba menciona ta traha digitalisa.

 

Na final tawatin “door-prize” obsequio di Taco Bell, Casa Tua y SETAR. Sra Rosa Leon, Lider di  Proyecto Hunto Grandi Grandi Hunto a gradici tur presente, tur instancia y negoshinan pa nan tremendo presentacion, sin lubida e boluntarionan cu di dianan anterior y riba e diamars, a coopera tremendo cu e programa aki.

 

Mester meciona cu nos adultonan mayor a bay cas cu hopi informacion y sigur nan lo no keda atras den e mundo cybernetico di awendia. Proyecto Grandi Hunto, Hunto Grandi, na nomber di nos adultonan mayor, ta gradici Fundacion Movemento ta bida, Cede Aruba, SETAR, Aruba Bank, Smart Systems, Save More, Compra, Romar trading, Smith & Dorlas, AZV, WEB, Elmar, Cas di Cultura, tur medio di comunicacion cu a coopera pa e programa aki por a bira un exito rotundo.