Home Politics Prome Minister Evelyn Wever – Croes: MASHA PABIEN NA FCCA CU...

Prome Minister Evelyn Wever – Croes: MASHA PABIEN NA FCCA CU E LOGO NOBO Y SIGUI OFRECE BON TRABOU NA COMUNIDAD

SHARE

 

 

ORANJESTAD – Prome Minister Evelyn Wever – Croes tabatin e honor di hiba palabra na e ocasion special unda cu FCCA a revela su logo nobo. Alabes a felicita FCCA y tur su empleadonan cu semper tabata para cla cu man habri pa yuda. y pabien cu e logo nobo. Masha pabien cu e logo nobo y sigui cu boso bon trabou. 

 

Fundacion Cas pa Comunidad Arubano, mihor conoci como FCCA, ta un fundación establecia pa Gobierno di Aruba na principio di 1979 cu e obhetivo di resolve e escases di vivienda social y ofrece un cas adecuado pa e famianan di Aruba, specialmente pa esnan cu tin menos recurso economico. Un trayectoria hopi largo cu a cuminsa na principio di aña 1979 bou di mando di diputado Charro Kelly, awe den felis memoria.

Den e añanan cu a sigui, FCCA a contribui grandemente na e meta aki y awe un gran cantidad di famia por tin un propio hogar. Na 1992 e actividadnan di construccion principlamente tabata wordo financia pa medio di fondonan cu e tabata haya den forma di presta na condicionnan hopi faborabel for di Gobierno Hulandes. Den esaki gobierno tabatin e papel di intermediador. Sinembargo, Desde 1993 FCCA ta haya su fondonan pa medio di prestamonan comercial cu ta bin pricipalmente di e mercado financiero local.

 

FCCA ta structura manera un banco di hipoteca pa cas pa famianan di Aruba cu mester un manera adecuado di financia construccion di nan cas, pa cumpra un cas o pa renobacion o ampliacion di nan cas existente. 

Prome Minister Wever – Croes a expresa cu e gobierno di e tempo ey lo no por a premira con grandi y exitoso FCCA lo bira, tampoco cuanto proyecto FCCA lo ehecuta durante di transcurso di tempo. Tampoco e gobierno di e tempo ey lo por a premira kico lo tabata e influencia di FFCA riba e reparticion di vivienda riba nos isla. Barionan completo a wordo crea pa cumpli cu e meta di duna cada famia un cas propio.

 

Manera tur empresa, FCCA tambe tin un emblema, un logo, cu ta haci cu bo ta reconoce e empresa di biaha. Pa añanan tabata conoce e logo cu mihor por wordo describi manera un cas estilo rubiano bieu carga pa tres figura di hende. Sin wak e palabra palabra FFCA banda di e ultimo figura di hende bo tabata sa na ken e ta referi. Desaroyo riba mercado tin biaha ta haci necesario pa bin cu ‘rebranding’ di bo empresa.E motibonan por ta varios: Bo kier duna bo empresa un cara nobo; E desaroyo y crecemento di Aruba como pais ta haci cu bo mester mas innovativo; Exigencianan medio ambiental ta haci cu abo como empresa mester cumpli cu esakinan; Bo kier acerca un publico nobo pasobra un mercado nobo ta desaroyando of paso bo vision pa futuro ta exigi un flexibilidad mas grandi cu bo tabata eherece te cu awe. E suma total di tur esakinan ta haci cu bo ta yega na e conclusion cu bo tin cu cambia bo mision, vision y proposito. Pa describi esaki sin haci uzo di palabra, un logo ta e manera mas simpel pa haci esaki. Pa ta efectivo den su forma di comunica un logo no necesariamente mester ta algo demasiado complica. Mas simpel mas eficiente. 

E logo nobo di FFCA ta e suma total di tur esaki. Si wak e logo nobo bo ta keda asombra di su simplesa. E ta un figura cuadra cu ta consti di 4 triangulo riba su punta, y e tin tres color. E colornan aki cu casi nos tur por reconoce den cas di nos grandinan. E ta e colornan cu e tegelnan di e casnan tabata tin; no solamente aki na Aruba, sino den henter e area di Caribe. E colornan ta tononan di oker/geel y blauw. E triangulonan segun nan secuencia, ta forma un patronchi hopi agradabel pa bista.

 

Finalisando Prome Minister a bisa: “E logo nobo aki ta sigui simbolisa e empeño y compromiso cu FCCA a desplega pa famianan Arubiano cu a bati na porta pa un ayudo cu nan cas. Mi ta felicita FCCA y tur su empleadonan cu semper tabata para cla cu man habri pa yuda. Masha pabien cu e logo nobo y sigui cu boso bon trabao,” Prome Minister a conclui.