ORANJESTAD: Diabierna anochi den Paseo Herencia Ballroom a tuma luga e Pre-Event di Premio Excelencia den Deporte 2019 & 2021. Presente ne ocasion special aki tabata Minister Endy Croes, nomindadonan acompaña pa nan famia como tambe representantenan di e federacionnan. Meta di e Pre-Event tabata pa laga e miembronan di prensa ser conoci cu e 141 nomindadonan di PED 2019 & 2021 di cerca como tambe pe atletanan y famianan socialisa. E nominadonan a ricibi nan banchi di entrada como tambe un ‘goodie bag’.
Comison organisado kier a yama un danki special na e patrocinadonan den sector priva pa duna nan contribucion na e Pre-Event di Premio Excelencia den Deporte por medio di un sponsorship pa e ‘goodie bag’; Aruba Bank, Aruba Tourism Authority, Elmar, TGI Friday’s Aruba y Paseo Herencia. Sin laga afo Stichting Sport Subsidie Aruba y Ministerio di Deporte.
