E biaha aki nos ta dedica un historia di Aruba na un historia tristo, na con humilde y bon creyente e pueblo di Aruba tabata den añanan 60. Hopi tabata asina fiel y bon creyente cu facilmente nan a cay den trampa of den gara di un Maestro estafador grandi.
Estafa hende, gana algun 100 mil florin na Aruba
Un estafador cu prome dia cu e la pisa suela di Aruba a nota cu e Arubiano mayoria ta bon hende, ta humilde y muy especial bon creyente y facil pa manipula. No ta solamente varios famia humilde di campo a bira su victima, pero tambe tabata tin algun comerciante, hendenan di sociedad, hendenan cu placa cu a cay den su trampa.
Den menos cu un aña di tempo e estafador aki a logra cash in algun 100 mil florin for di nos Arubianonan humilde di antes, cu tabata kere masha hopi mes den bruha. Danki na Inspecteur Kibbelaar y su team di recherche cu a pone un fin na e actonan baho di e estafador aki.
Su ayudante
E homber P.Q., un arubiano yama e tempo ey Shon Pe cu lo a mira con lihe e tambe lo por gana poco placa cu manipulacion y estafa hende, sigur no a laga e oportunidad aki pasa y a gar’e cu dos man. E la bira e ayudante principal di e estafador aki. Bruheria e tempo ey tabata un bon negoshi, of miho bisa un gran estafa. E ayudante tambe a wordo poni tras di tralie y sigur lo a keda warda ki ora su gran Maestro bruho lo sak’e liber.
Despues cu e esaki a sali na cla hopi hende tabata comenta, ta “Hende mes kier a wordo engaña.”
Maestro Indio, un hindustan cu a yega Aruba for di Surnam
E homber J.G. yama pa su clientenan Maestro Indio. Maestro Indio a nace y tabata biba na Surnam, Maestro Indio tabata di origen di India, su mayornan a imigra bay biba na Surnam. E tabata biaha via Trinidad pa yega Aruba. E unico cos cu e tabata un Maestro den dje, tabata estafa hende, hendenan cu ta kere tur locual e tabata bisanan.
Shon Maestro a yega Aruba pa prome biaha na maart 1959, hopi lihe e la ripara cu na Aruba tin un cantidad di hende humilde ta biba y cu nan ta kere fielmente den bruheria, den cuenta di spirito malo y bon etc.. mesora un luz a cende cerca Maestro y a mira cu aki na Aruba si e lo baha un bon jackpot.
Maestro hopi lihe a bira hopi popular na Aruba
Maske na Aruba mayoria di e pueblo ta Cristian y bruheria tabata algo taboe, pero asina mes hopi hende tabata kere den bruheria y den cuenta di spirito. Maestro tabata wordo ayuda pa algun persona local, especialmente e tal (P.Q.) yama Shon Pe, tambe un dama locual kende tabata dune un man ora e mester haci su actonan di ilusionista. Asina e Maestro Indio a cuminsa cu su practicanan “oculto” na Aruba tambe.
Ora cu Maestro bin Aruba, e tabata keda na un cas di un famia local of na un hotel for di eynan e tabata sali bay haci su consultanan, su trabounan y bende su productonan di supuestamente suerte y limpiesa. E prijsnan pa su servicionan y productonan tabata hopi caro, te hasta pa e tempo moderno di awendia, nan ta impagabel.
Maestro hopi lihe a cuminsa bira masha popular na Aruba, un demanda grandi pa su servicionan a cuminsa presenta, for di tur skina di Aruba e tabata wordo pidi pa yuda famianan cu tabata den necesidad cu un ayudo den e mundo esoterico, spiritual, den e mundo di bruheria etc, tur hende tabata bisa cu Maestro tabata e persona ideal na Aruba.
Maestro tabata bay su pais bek cu maleta yen placa
Maestro tabata trece Aruba diferente producto di suerte pa bende y pa haci trabounan di limpiesa of bruheria, asina Maestro y su ayudantenan a cuminsa ta gana un cantidad grandi di placa bruto. Ora Maestro tabata regresa Aruba e tabata trece mercancia y ora di bay bek, e maleta tabata bay yen placa, mientras e famianan Arubiano humilde ta keda mas pober y mayoria biaha cu debenan grandi atras.
Rico y pober tabata cay den su gara y trampanan
No ta famianan humilde di campo so, pero te hasta e la haci un trabou pa un comerciante local di e tempo ey y acambio e comerciante a pag’e cu un auto di su soño, un auto moderno, nobo nobo. E auto a wordo poni riba bapor di carga y manda Surnam pa e Maestro y su famia por tabata tin un auto di ultimo modelo pa core rond den dje. Asina Maestro poco poco tabata ganando teritorio na Aruba.
Su negoshi lucrativo di bruheria, no a keda solamente na Surnam, Trinidad of Aruba, pero asina e tabata biaha bay na diferente isla den Caribe y tabata estafa mayoria di bes hendenan humilde y pober cu ta kere den un poco awa di color cu lo trece abundancia y suerte pa nan.
Nos por yame Maestro, charlatan, estafado, bruho, ilusionista etc, pero e tabata sa cu poco gañamento, algun truco bon hinca den otro y ayuda pa algun hende local, convence hopi famia na Aruba.
Un cancer peligroso pa nos comunidad
Autoridad a compara E maestro su obranan mescos cu un cancer peligroso pa nos comunidad. Hopi lihe e informacion di e Maestro a yega na orea di autoridad di Aruba, pero no tabata facil pa pone man riba dje y manera Hulandesnan ta bisa op heterdaad betrappen, con la mano en la masa, tabata casi imposibel.
Su negoshi di estafa hende na Aruba a crece bira grandi
For di Maart 1959, Aruba a bira e isla caminda e ta cash in miles y miles di dollars, cada biaha cu e bishita Aruba, e tabata bay su pais masha contento bek. Famianan tabata bira desespera y tin cu te hasta a hipoteca nan cas pa paga e Maestro bruho aki.
Su negoshi na Aruba tabata floreciendo, placa bruto cada biaha, e Maestro y su ayudantenan a sinti dushi di ranca placa for di pober. Autoridad tabata na altura di consultanan y e bruherianan etc. den cunucunan na Paradera, na Santa Cruz y na San Nicolas, pero no tabata tin suficiente prueba pa detene e Maestro Indio, bruho, estafador grandi aki. Esaki pa motibo cu e hendenan mes ta acepta boluntariamente pa e bruho haci algun trabou pa nan y nan no ta dispuesto pa duna autoridad informacion tocante di esaki, ta comprendibel di un banda nan tabata hibando un bida spanta keriendo den existencia di cosnan oculto, mal spirito etc. maske nan sa cu loke nan ta haciendo no ta bony cu e esaki sigur no lo carga aprobacion di tur hende den comunidad. Di otro banda e hendenan aki ta bou di e impression cu e hacido di bruha, kende tambe su seguridad na Aruba ta depende di silencio di su clientenan.
Autoridad cu bista riba e estafador
Tur cos a dal un buelta durante su di 6 bishita na Aruba na final di Januari 1960, despues di hopi investigacion recherche por fin a bin haya un tip, cu a pone e caso aki a cuminsa lora. Un persona a informa autoridad cu e Maestro hacido di bruha riba cierto dianan lo bay duna un consulta/bishita, na cas di famia B. na Paradera. Mesora como 6 recherche y polis, bou guia di inspector di polis di e tempo aya A.E. Kibbelaar a bay direcion di e cas aki. Nan a keda scondi ta warda asina cu e bruho cuminsa cu su consulta.
Famia humilde di Paradera
E cas na Paradera tabata un cas den cunucu di un famia hopi humilde di fam B. E pober famia tabata hopi desespera pasobra e pareha tabata tin un yiu homber cu lo tabata sufri di atacanan y no lo por a cana bon. Segun mediconan di e tempo ey, a bisa e famia cu e atacanan aki tabata incurabel. E famia a bishita varios medico, pero ningun no por a yudanan cu salud di nan yiu homber. Despues cu nan a tende di e Maestro Indio, yen di miedo via via nan a dicidi di tuma contacto cu Shon Pe, pa asina regla un cita cu e Maestro bruho pa nan. Nan unico speransa tabata e Maestro Indio. Manera cu tabata di spera di un estafador, e la contesta e famia di biaha, cu e SI por cura nan yiu di e enfermedad cu dokternan a bisa ta incurabel.
E prome ceremonia cu Estafador “Maestro Indio”
E prome contacto cu e maestro aki tabata riba 17 di Januari 1960 y e delaster riba 25 di Januari 1960. Na momento cu e maestro a acepta di yuda e famia, e la bisanan pa nan percura pa nan tin lo siguiente den cas: Cuater yarda di tela cora, 24 bela, 72 hangua, mey liber di sucu y salo, tres tayo chikito, un carson bieu, un caminsa y un par di sapato di e yiu enfermo y un pida di su cabey, tambe nan mester a busca un galiña preto y 430 dollar.
E prome cita cu e Maestro Indio tabata tin cu famia B. tabata na nan cas na Paradera. E maestro a cuminsa su ceremonia, cu un examinacion di e mucha homber enfermo su pia. E la haci esaki cu un vergrootglas pa supuestamente mira kiko tabata e causa di e malesa.
Na dado momento e la pone e mucha homber para riba un pida paña cora, despues e la scheur varios repi for di e pida paña y a mara esaki bou su brasa, na su pia y cabes, despues e la cuminsa manipula cu bela y a cuminsa resa. E la pidi e famia pa resa cu ne.
Spirito malo, peligroso
E Maestro a bisa e famia cu e mucha ta malo pa motibo cu lo tin un spiritu malo dera na e cas. E la sigui bisanan cu ta enemigonan di e famia a dera un spirito malo patras di nan cas y cu e por saca e spirito malo for di patras di e cas, pero e ta un trabou poco peligroso.
Tambe na final di anochi e famia a mester a cumpra awanan di suerte, pa limpia e cas, tambe renchi di suerte y algun cos mas pa supuestamente drecha nan futuro. E anochi aki e maestro a traha un cita atrobe cu e famia pa asina bay saca e spirito malo.
Cobamento y sacamento di spirito
Dia 24 di Januari 1960, e maestro bruho a bolbe bay na e cas di famia B. e biaha aki e la bay pa saca e supuesto spirito malo cu lo ta dera patras di e cas. Pa e maestro convence e famia di locual e la bisanan ta berdad, e la invita e famia completo pa compañe bay patras di e cas, pa nan mira con e ta coba y saca e spirito malo cu supuestamente lo tabata dera patras di e cas.
Spirito malo patras di e cas
Mas cu claro den oranan di anochi scur, acompaña pa su ayudantenan y e famia, e bruho a bay patras di e cas, cu un piek, cu shobel, e la cuminsa coba den e tera patras di e cas. E famia humilde cu tabata keriendo fielmente tur locual e Maestro bruho a bisanan, tabata morto spanta, nan a rondona e Maestro pa mira con e tabata coba den e tera pa saca e spirito malo, cu masha poco luz, djis un poco claridad di luna.
Estilo di un pelicula di horror
De bes encuando e biento ta manera lanta fuerte, e cas cu ta den un situacion deplorabel ta kraak y e bruho cada biaha ta lanta cara mira nan y mas miedo e pober famia ta haya, pero nan fe den e Maestro bruho ta grandi y nan ta keda keto keto, sigui cu hopi atencion pa mira kiko e bruho lo bay saca for di e tera. Leu a leu un biento hopi mas fuerte ta pasa sacudi e matanan den cunucu, e ta lanta e blachinan seco y esaki estilo di un pelicula di horror. Cacho leu a aya ta yora, mas y mas e famia tembla, cada biaha yen miedo nan ta krim mas banda di otro. Segun e bruho esaki lo ta e señalnan cu nan ta yegando mas cerca di e spirito malo.
“At’e prueba aki”, spirito malo su carta “2125 Dollar”
Diripiente e maestro a stop di coba, e la cuminsa busca den un poco tera y pa sorpresa di e famia, e la saca un carta tur na tera. E maestro orguyosamente a mustranan “At’e prueba aki”. Un carta skirbi na papiamento cu un mensahe dje spirito malo, riba e papel tabata tin yen cabes di carpachi pinta.
Segun e spirito e lo sigui haci daño na tur hende cu ta biba den e cas, mientras cu nan no ta dispuesto pa haci un sacrificio grandi pa ten’e contento. Den e carta e spirito tabata exigi di e famia un suma di no menos cu 2125,00 NO FLORIN, pero DOLLAR.
E tera y 2125 dollar mester wordo benta na lama
E maestro a sigui splica cu e placa aki hunto cu e tera cu a wordo coba mester wordo benta na lama. E maestro a informa e famia cu esaki ta un encargo hopi peligroso pa nan mes bay haci. Mas cu claro cu e unico persona indica cu ta capas pa haci esaki ta e Maestro Bruho mes.
Naturalmente cu e Maestro Indio lo tuma encargo di benta e tera y e 2125 dollar den lama. E Maestro a sigui informa e famia, cu e unico cos cu e famia mes mester haci ta, busca e 2125 dollar, e parti peligroso lo keda bou su encargo.
Mester a bay fia placa
E suma grandi aki tabata un problema hopi grandi mes pa e famia, pa motibo cu algun dia prome nan a paga e Maestro caba pa algun tratamento, manera bañonan di 150 florin y varios otro cosnan di suerte durante nan prome cita.
Spirito malo cera na lock den un cuarto paden di cas
E famia a keda hopi preocupa paso e 2125 dollar mester bay wordo fia, paso nan deseo di mas grandi ta pa nan yui homber bira bon y riba dje e bruho a saca e spirito malo caba for di patras di e cas y pa colmo lo a ward’e hunto cu poco di e tera lora den un pida corant, den un cuarto chikito den e cas. E maestro a cera e cuarto na yabi y a keda cu e yabi.
E pober famia B. e anochi ey a keda tur malo, nan no por a drumi, hopi preocupa paso e spirito malo mester bay y nan no por haci nada otro, nan mester e 2125 dollar, paso e spirito malo riba dje no kier e cent na florin si no na Dollar.
Spirito malo cera den cuarto saca holo putri
Manera mainta a habri, e famia a cuminsa busca placa pa fia. Pasobra pa e famia aki e asunto aki tin hopi prioridad, ya caba holo stinki a cuminsa sali for di e cuarto y esaki a pone e famia pensa cu e spirito malo ta presente den e cuarto. Morto spanta e humilde famia tabata acerca amigonan, famianan pa yudanan cu placa.
Maestro a haya su palo bon mereci
Dia 25 di januari 1960, anochi a bolbe cera, si e famia a logra cera full e 2125,00 dollar of un parti di dje, no tabata conoci. Pero si cu e anochi ey Shon Maestro contento a bay na e cas sin sa kiko tabata sper’e. E la bay pa busca e tera y e 2125 dollar cu e lo mester bay tira na lama.
Na momento cu e Maestro a cuminsa cu su consulta/ cita como 6 pa 8 polis a drenta den e cas. E agentenan aki sigur no a drenta pa consulta, pero pa aresta e Maestro y su ayudante Shon Pe, pa estafa di hendenan inocente y humilde. Autoridad a garanan den un accion di bruheria. E detencion aki a causa un consternancion grandi na Aruba e tempo ey.
E bruhanan local ta nada compra cu e Maestro Estafador
E prome comentarionan di inspector di polis di e tempo ey, “E hacido di bruhanan cu de bes en cuando tabata wordo deteni na Aruba y cu mester a presenta dilanti hues tabata hopi biaha algun mucha muher cu ta manipula hende cu poco salo cu pepper tira riba cama of den sapato, algun coi loco nada compara cu tur locual e bruho Hindustan aki tabata capas di gaña, e tabata sa con pa manipula mente di Arubianonan.”
Con e carta di e spirito malo a yega den e tera
Durante interogacion a bin haya varios contesta riba preguntanan cu a keda habri. Por ehempel, tur hende tabata kier sa con e bruho a saca e carta for dje buraco cu e tabata coba? durante su interogacion e la declara cu e la laga un dama local cu tabata un di su complicenan traduci e carta na papiamento p’e. E la pone den un botter y durante cobamento den e scuridad, e maestro bruho a laga e botter sali cay for di su manga di camisa, durante e cobamento e la kibra e botter, susha e carta poco den e tera y despues a saca e carta.
Holor stinki
Un otro pregunta tabata esun di e holor stinki cu tabata sali for di e cuarto den e cas, e la bisa polis cu ayudo di su complicenan e la pone algun weso cu net a cuminsa putri den e tera y dimes esaki ta bay saca holo stinki.
Varios polis cu miedo di e articulonan confisca
Despues cu autoridad a confisca tur su bruherianan, su awanan di suerte etc. nan a wordo warda na Warda di Polis di Oranjestad. Na warda di Oranjestad, hopi polis tabata tin hopi miedo di tur locual a keda confisca for di e Bruho Indio. Un coleccion di bruha cu ta unico den su sorto. Botternan chikito cu tur sorto di color di awa, cora, berde, blauw, etc. papelnan skirbi ribanan ” miracle cure” “bebe 7 bes pa dia” renchinan di herro, propnan di catuna cosi den sacunan di paña cora.
Tambe un monton di tera cu e bruho a coba na e cas di famia na Paradera, tur a wordo hiba na Warda di Polis. Nada milagroso of particular, puro potoshi y nonsense.
Listerine, fosforine, brylcream, awa y tiña
Algun polisnan cu no ta kere den bruheria, a dicidi controla tur e botternan cu a wordo confisca for di e Maestro. Asina nan a bin descubri cu no tabata nada mas cu Listerine, fosforine, brylcream, awa, tiña di diferente color, tur tabata cosnan cu ken cu ta por a cumpra pa algun cent e tempo ey na boticanan.
Lucky-Mo-Jo pa laba vloer
E producto Lucky-Mo-Jo pa laba vloer si probablemente ta cos cu e lo a trece di Trinidad y cual e la bende masha hopi mes di dje. E Maestro Bruho tabata biaha via Trinidad pa Aruba. Lucky-Mo-Jo tabata supuestamente un awa pa laba vloer y asina core cu tur enfermedad, tur cos malo etc. for di casnan. Segun e Maestro, hende mester frega nan vloer di cas bon tur dia cu ne.
Un Lucky- Mo-Jo tabata costa 250 florin. E maestro bruho Indio a logra bende un gran cantidad di Lucky-Mo-Jo na Aruba.
Renchi di suerte, cumpra na un jugueteria na Trinidad
Un otro articulo cu e Maestro bruho aki a logra bende hopi bon mes na Aruba, tabata un renchi di aluminium cu un cabes di carpachi riba dje, e tabata tin algun stenchi cora como decoracion. E renchi aki supuestamente tabata wordo bendi pa protegabo di mal wowo, ora autoridad a bay check e renchinan aki tabata wordo bendi den un jugueteria na Port of Spain pa menos di un florin pa un. E bruho aki a sa di a convence e humilde Arubianonan creyente fiel di su persona cu esunnan cu bisti e renchi aki nunca mas lo tin mala suerte den su bida, nan lo tin exito cu mucha muher y den hopi mas cos. E prijs di e renchi aki tabata solamente 425 florin pa un, anto na aña 1960. Diferente hende na Aruba a cumpra e renchi milagroso y poderoso aki, e tabata gusta bende su articulonan durante e reunnionnan misterioso den cunucunan leu den mondi of durante consulta di bruho na San Nicolas.
Hinca curpa den debe, hipoteca cas pa paga bruho
E estafador aki a trece un cantidad di Arubiano den miseria of den mas miseria cu nan tabata ta caba. Pobernan cu ta traha den cunucu di unda nan a saca sumanan asina grandi pa paga e estafador aki. Autoridad a interoga diferente testigo, na comienso di e investigacion, e recherchenan a bin compronde cu e Maestro aki a pone hendenan den nan desesperacion hipoteca nan cas pa sumanan grandi cerca fiadonan priva cu ta cobra interesnan e tempo ey hopi halto. Simpelmente pa paga pa algun botter yena cu tiña berde, cora of blauw etc. Otronan a pag’e bruho como recompensa pa locual e la primintinan, por ehempel di causa desgracia of mala suerte na nan enemigonan, pero tur e supuesto bruhanan aki mester a wordo paga adelanta, prome cu mira e resultado, cual sigur nunca nan a mira.
Potret di politiconan, huesnan, hefenan di lago etc.
Recherche durante investigacion a haya un collecion grandi di potretnan den e pertenencianan di e bruho, potretnan di ministronan, politiconan, huesnan , abogadonan, hefenan di lago, y hefenan di departamentonan di gobierno.
Algun 100 mil florin e la estafa na Aruba so
Segun autoridad nan a calcula cu durante e 6 biahanan cu e maestro estafador aki a pisa tera na Aruba, e la logra bay cu algun 100 mil florin.
Un negoshi na San Nicolas a regale un auto nobo hopi caro, un auto special di su gusto, e auto aki a wordo manda pa su persona, na Surnam. Na momento cu e la wordo aresta e tabata tin den su sacu 310 dollar y 4650 florin. Esaki tabata entrada di un dia so. Tambe polis a drenta na unda e tabata hospeda y aki nan a haya un typemachine nobo nobo y un radio portatil.
Tremendo trabou di polis
Maestro Indio, su fantasianan no tabata conoce limite, e tabata bende varios renchi cu supuestamente lo ta haci milagro , e bruho aki tabata gana bon placa cerca nos Arubianonan humilde y buen creyente. Cu detencion di e maestro estafador aki, Polis a haci un tremendo trabou na e comunidad di e tempo ey.
Caso den corte
Diabierna dia 4 di maart 1960, bou di hopi interes publico e maestro hacido di bruba un surnameo Hindoestan di 40 aña cu a wordo deteni riba 25 di januari 1960, mester a presenta den corte. Un caso extra ordinario y e publico presente tabata scucha cu tur atencion. Esaki sigur mester tabata un experiencia cu mester sirbi pa tur hende, cu den nan desesperacion ta core na bruhonan.
Famia B. mester a ripiti tur loke a sosode di A te Z.
E fiscal tabata completamente for di su humor vooral e forma con e hacido di bruha tabata trata na engaña hende y esaki por a nota den e demanda di fiscal, cu tabata 4 aña di prison.
E fiscal a cuminsa: “Kiko nos por pensa dje persona aki, di un homber asina sencillo, e no tin un postura impotente, ni un cara di astuto, e tabata un tipo comun y coriente y su poder mas parti tabata den su capacidad di vocabulario. Un homber cu tin palabra na ora y sa con ta fit su emocionnan den cualkier situacion.”
E acusacion contra e Maestro Bruho tabata esun di mas largo cu pa e tempo ey nan a yega di scucha. Un historia completo di engaño. E famia di fam B. di Paradera, tambe mester a presenta den corte y Huez a pidi nan pa ripiti tur locual a sosode di a te z.
Cuminsando cu e examinacion cu un vergrootglas bou pia di nan yiu te na cobamento den e cura, patras di cas den oranan di anochi.
Cambiamento di declaracion
Na momento cu a toca e tema di e mensahe di e spirito malo, e bruho a cambia su declaracion y den corte e la declara cu e mes a skirbi e mensahe na ingles y a pidi un habitante cu tabata na e mesun hotel cu ne pa traduci e mensahe aki na Papiamento pa su persona. E famia a sigui conta cu nan a hiba un susto enorme ora nan a mira e papel cu yen di cabes di carpachi pinta riba dje. Y e mensahe cu tabata bisa ” lagami bisa bo un cos, bo so ta den mal caminda. Tur bo famianan lo bay uno tras di otro y cos lo cai pa bo te na suela. Bo truck lo lagabo na caya.”
E famia a bisa Hues cu nan a paga e surnameo caba na momento cu e la wordo aresta. Nan a pag’e 2 mil florin mas 430 dollar.
Durante e tratamento di e caso den corte e maestro bruho kier a trata na tira culpa mayoria parti riba e persona cu tabata intermedia pa su persona “Shon Pe”. Shon Pe tabata e persona cu tabata introduci Maestro Indio tur caminda y segun e maestro cu Shon Pe hopi biaha tabata bisa e clientenan henteramente otro cos cu loke e ta pa splica e “pashentnan”, asina e Maestro tabata yama su clientenan.
Hues a puntra e Maestro” Ma bon pakiko bo kier a mira bou di e pashent su pia?” E la contesta: Mi kier a mira si tal bes por tabata tin un adder diki bou di su dedenan, pero mi no a mira nada.”
Hues a contest’e bek” Pero examinacionnan manera esakinan bo mester laga pa dokternan, Bo sa masha cu ta di spetakel bo ta tuma e hendenan hasi?
Despues e la cuminsa yora y a contesta hues: ” Si, honorable Huez”.
Buki oracion na Hindustan
Segun su declaracionnan den corte, e la sigui conta con e la pone e “Pashent” na e cas di famia B. para riba un pida paña cora, despues e la scheur varios repi for di e paña y a mara bou su brasa, na su mira y cabes y ela cuminsa manipula cu belanan y resa. E la pidi e famia pa resa hunto cu ne. Hues na su turno a puntr’e: ” Ta for di e buki aki bo tabata resa?” y hues a saca un buki for di un tas cu a wordo confisca. Hues a puntra Maestro: ” Ta ki clase di buki esaki ta?” E la contesta cu ta un buki di oracionnan hundistani.
Hues a bira conteste” pero con bo kier pa e hendenan resa cu bo siendo ta oracionnan na Hindustan bo tabata resando, dicon bo ta pidi nan pa resa hunto cu bo?” E la contesta cu e la permiti esnan cu tabata presente na e cas pa resa na nan manera.
Fiscal na su turno a agrega acerca “bo a haci mal uso di e hendenan simpel aki y nan creyencia humilde”.
Galiña preto y 430 dollar?
Den corte ora a toca e tema di e galiña preto y 430 dollar.
Hues a puntre ” Kiko e galiña preto tin di haci cu e ceremonia?”
E Maestro a contesta hues: ” Esey tabata pa come despues di e ceremonia.” Hues a puntr’e y e 430 dollar, tambe a wordo reparti?” Aki e maestro a declara: “No e dollarnan a no a wordo reparti”, esaki nan SI Maestro a hinca den su saco prome cu tur cos.
” Bunita ganashi”
Tambe e acusado a declara dilanti mesa berde, cu tur e otro remedinan, renchi di suerte etc. ta cos cu e la cumpra riba mercado local barata y tabata plak un papel riba nan cu e la laga traha na Venezuela. E tabata cumpra e renchinan pa un dollar y tabata bende hendenan pa 250 florin como renchi di suerte.
Riba esaki Hues a comenta; ” Bunita Ganashi”
Tambe e suma di 2 mil florin y 430 dollar cu famia B. a paguele Hues a bisa cu e ta haya esaki un bunita sueldo. E cantidad aki ta mas cu cualkier dokter ta cobra.”
Hues a sigui bisa” pero en todo caso, bo no mester abusa di e hendenan cu ta ta dispuesto pa paga un cantidad di placa pa mira nan famia a haya nan salud bek. Esey bo mes ta compronde.”
Buki cu recibonan di sumanan grandi
Durante tratamento di e caso den corte a bin resulta cu no ta famia B. no tabata e unico victima di e maestro aki. Esaki a wordo comproba cu e suma grandi di placa cu e Maestro tabata tin den su poder durante cu e la wordo aresta.
Un otro persona F.M. di Rooi Bosal a pag’e 1900 florin. Durante su detencion Polis a confisca e buki den cual e ta skirbi tur su entradanan. Den e buki aki, autoridad a haya recibonan traha pa 750 dollar, 250 dollar, 615 dollar, 863 dollar y 300 dollar.
Sumanan cu pa e tempo ey tabata pone hende nan cabes draai. Maske no ta tur hende a paga ainda, pero lamentabelmente mayoria si. Danki Dios cu no ta henter a Aruba a cay den trampa di e Maestro Indio, di otro banda tabata tin e grupo di hendenan cu a hari e Gran Maestro aki den su cara, ora e la papia cos di spetakel cu nan. Asina mes hopi hende toch a kere den su mentiranan, pa e personanan aki sigur e realidad tabata un golpi duro, despues di a scucha con den corte con e Maestro Indio G. mes a declara cu e la tumanan tur haci.
Castigo maximo di 4 aña
Fiscal a haya cu e pruebanan di desfalco claramente a keda comproba. Fiscal a bisa: cu e informacionnan di cual estafador mes no ta kere y door di manipulacionnan astuto, e la haci e hendenan kere cu e tabata papia berdad y av haci cu nan a entreg’e placa. E la haci mal uso na un forma hopi baho di creyencia di e hendenan aki, den nan debilidad di malesa y supersticioso. Fiscal a sigui bisando: “considerando tambe cu e remedinan cu e tabata duna e hendenan por causa un peliger na nan salud y fiscal a pidi pa e wordo castiga debidamente pa por sirbi como ehempel pa tur otro bruhonan estafador. Pa e motibo aki e la exigi e castigo maximo di 4 aña.
Durante e palabranan aki di fiscal, G. tabata tin un mirada hopi tristo. Su casa cu tambe tabata sinta den tribuna cu un paña masha bunita di India y cu sapatonan di oro cu e tempo lo tabata algo masha luhoso y moderno.
Abogado defensor mr. P.V. Sjiem Fat
Abogado P.V. Sjiem Fat tabata e abogado defensor di Maestro Indio, Bruho estafador. E abogado a tene un defensa basta detaya, den cual e la trata na contradici diferente di e puntonnan di cual su cliente ta wordo acusa di nan.
Segun e abogado: “E iniciativa pa consulta cerca G. tabata sali semper for di e hendenan mes y cu G. no a loknan uit cu palabranan di engaño. Ademas e abogado a bisa cu ley t’ey pa proteha tambe hendenan cu tin sano huicio y no hendenan cu ta asina dom, cu nan ta kere den milagro.” Su abogado a sigui:” Loke G. a haci ta asina estupido, cu ningun hende na su sano huico lo por ker den dje, di locual a wordo declara ta resulta cu e victimanan a entrega placa na e acusado pa motibo cu ta nan mes ta kere den bruha.”
Pakiko ley no a persigui Shon Pe
Abogado Sjiem Fat a sigui bisa, cu e ta haya tambe pakiko ley no ta persigui Shon Pe. “E homber aki tambe a gosa di e entradanan, un homber cu tambe a declara na e hendenan diferente informacion y siendo e sa masha bon cu ta engaño. Abogado a pidi hues pa anula e dagvaarding of por lo menos ta conclui di loke su cliente ta wordo acusa no ta comproba.
” Pordon honorabel huez”
Despues cu e abogado a pidi esaki, G. a cuminsa yora manera alma malo den corte. E la cuminsa ta sclama y pidi pordon, ” Pordon honorabel huez”, esaki masha dramatico.
Hues no a acepta e peticion di e abogado pa pone G. den libertad. y a ordena pa tene preso y dos siman despues e la haya su sentencia cu a wordo pidi p’e.
Ken e bruho y su complicenan tabata ta, nos no sa. Pero un cos ta sigur cu e la hunga cu sentimento y sufrimento di hopi hende, e la duna hende speransa falso, mayoria parti di hendenan humilde cu tabata desespera, cu kier a mira un milagro sosode por medio di un baño cu awa di color, of por medio di un renchi pa drecha nan situacion. Lamentabelmente esaki no ta existi.
Leu a leu den e tempo moderno aki ainda bo ta tende di maestro aki maestro aya, nan tambe ta bin for di exterior, bruhonan estafador ainda ta existi. Hopi biaha hendenan den problema financiero ta bira desespera pa haya trabou of un poco miho porvenir den bida y nan ta bay purba nan suerte cerca un Maestro/bruho/ Babalao etc pa drecha nan suerte y nan finanzas, pero remarcabel ta cu e bruhonan aki cu supuestamente den un mirada mester reconoce situacion di un cliente, ta haci manera nan nanishi ta sangra y ta yega pidi sumanan gigante di placa pa supuestamente yuda e pober cu ta den problema financiero. Con bo por yuda un pober si bo ta pidi’e sumanan astronomico di placa, siendo bo sa miho cu e persona no tin por ta ni pa come. Un bruho/ estafado tin e pudor di cobra un pober sin pariba of pabou, cu su cara di palo, exigi por ehempel 2 mil florin pa supuestamente yude cu algo, un baño etc. pa e por haya trabou, of haya poco suerte. . .
Anto e ora esaki t’e contesta “Hende mes kier wordo engaña!