ORANJESTAD: Diamars mainta Minister Endy Croes a presencia apertura e di 25 aña academico di Colegio EPI hunto cu personal di e scol. Na yegada e mandatario a wordo ricibi door di directora di Enseñansa sra. Claudia Whitfield. Un mainta hopi ameno y placentero na unda docente, facilitair, werkster, administratie, staf y managers a bini hunto pa habri e aña escolar 2022-2023. E mandatario di enseñansa a hiba palabra na unda e la gradici e docentenan pe trabou cu nan ta bin ta desplega e ultimo añanan. Boso ta e motor pa educa nos muchanan di mañan, esan cu mester aporta na e desaroyo di e pais aki.
E mandatario a sigui bisa; den cuadro di celebracion di 25 aña nos lo traha mas cerca cu EPI e aña escolar nobo aki. Enseñansa no ta bay sin reto tanto pais Aruba como mundialmente tin retonan grandi. Retonan riba nivel di Gobierno nos ta trahando riba nan pa asina por acomoda bosonan como maestro y como scol pa duna boso e miho ‘tools’ posibel pa futuro como tambe pa e docentenan sinti bon den e trabou bunita cu nan a scoge.
Minister Endy Croes a sigui bisa; sigur e lo ta un aña hopi special pa e scol mirando tur e cambio y innovacion cu lo bay wordo implementa na EPI. Minister Endy Croes a laga atras un mensahe di 4 C di siglo 21. E prome C ta di comunicacion, cu ta di vital importancia pa por comunica den ful e cadena di EPI. Di 2 C ta di colaboracion entre sector y coleganan sirbiendo asina interes general di e alumno. E di 3 C ta pensa critico pa asina bin na solucion pa por resolve e problemanan. Por ultimo e C di creatividad, pasando den e retonan nos mester ta creativo esaki no ta conta pa e docentenan so, den Ministerio nos tambe ta creativo cu e recursonan cu nos tin, con nos por uza nan na e miho forma pa sirbi e interes general. E mandatario a sigui bisa algo cu e ta para pe ta trabou den ekipo. Si nos tin esaki como nos pilarnan e aña escolar aki lo ta uno hopi exitoso y nos por duna e miho resultado posibel pa e alumno cu tin cu keda central. Concluyendo Minister Endy Croes ta gradici pe invitacion y caluroso recepcion. Un bunita mainta hopi positivo cu un ekipo cla pa brinda e ayudo na e desaroyo di nos alumnonan. Hopi exito na tur alumno y docentenan den e aña escolar 2022-2023.
