ORANJESTAD – Prome Minister Evelyn Wever-Croes hunto cu director di DOW sr. Marlon Croes a bishita e rotonde nobo di Adriaan Lacle Boulevard y Wilhelminastraat pa asina admira e trabou grandi haci pa DOW cu tabata encarga completamente cu e construccion di e rotonde aki. E ekipo di DOW a traha den dia y anochi pa asina caba cu e rotonde aki den un tempo relativamente cortico. Asina ofrece comunidad di Aruba un trabou di bon calidad, treciendo un fluho mas rapido den centro di ciudad.
Prome Minister ta gradici e trahadonan di DOW y tur cu a contribui pa por entrega e trabou aki den e tempo stipula.
Director di DOW, sr. Marlon Croes na su turno tambe a splica cu e ekipo di DOW y e contratistanan a traha 10 dia largo pa renoba y converti e crusada aki den un “overrijdbare” rotonde. Segun sr. Croes e trabounan a trece retonan grandi pa e ekipo di DOW mirando cu tuberianan bou tera mester a wordo cambia. A pesar di tur dificultad, a traha duro pa asina dia 16 di augustus por oficialmente habri e rotonde aki pa crea un miho fluho specialmente awor cu scol ta habri bek.
Sr. Marlon Croes ta gradici pueblo di Aruba pa tur e pasenshi brinda durante ehecucion di e proyecto aki.
