Home Politics FRACCION DI AVP BASTA RABIA, TA SOLICITA REUNION URGENTE RIBA COSTO DI...

FRACCION DI AVP BASTA RABIA, TA SOLICITA REUNION URGENTE RIBA COSTO DI BIDA

SHARE

 

 

Lider di fraccion mr. Mike Eman ta mira situacion ta alarmante den barionan !

 

Awe fraccion di AVP den parlamento di Aruba a entrega un peticion pa un reunion publico encuanto e aumento drastico di costo di bida y e deterioro di e poder di compra di nos cuidadanonan. Den e sesionan di reunion di cada siman cu partido AVP ta organisando den diferente bario, a bira bisto e pobresa creciente den nos hogarnan. Fraccion di AVP ta precupa pa e falta di prioridad y vision di Gabinete Wever-Croes II pa brinda un alivio na e sufrimento den nos comunidad. Nos famianana ta haya nan mes mas y mas confronta cu pobresa creciente y alarmante. Esaki ta confimra tambe pa e cifranan emiti pa CBS. Costo di bida y gastonan pa exsistencia di un famia a conoce un aumento dramatico desde 2017. Medidanan cu Gabinete Wever-Croes a implementa durante e ultimo añanan a impacta e cifra di inflacion severamente. Na 2017 ainda inflacion tabata -0.6%. Despues di 2017 inflacion a keda subi so y tur prognostico ta mustra cu e aña aki inflacion ta sigui un rumbo devastador. Mientras tanto cifranan di CBS di 2022 compara cu December 2017 ta mustra cu e bestaansminimum pa un persona pa luna a aumenta cu practicamente 400 florin desde 2017. E bestaansminimum pa 4 persona, 2 adulto y 2 mucha a aumenta na 2022 cu practicamente 700 florin pa luna desde 2017. Esaki no ta inclui ni e impacto cu introduccion di BTW lo tin pa Aruba, aumento di awa y electricidad, aumento di prijs di medicamento y mas otro medidanan cu Gabinete Wever-Croes ta preparando.

Líder di fracción di AVP mr. Mike Eman a subraya cu e desesperacion y depresion den nos comunidad ta efecto di e maneho deficiente di Gabinete Wever-Croes cu awe ta percura cu e costo di bida di nos cuidadanonan a aumento asina drástico. Na momento cu Gabinete Wever- Croes a asumi responsabilidad gubernamental un di su prome decision tabata pa redobla BBO, cu awe ta causando un efecto devastador pa nos cuidadanonan. Líder di fracción di AVP mr. Mike Eman enfatisa cu mundialmente Gobiernonan ta proveyendo alivio den forma di reducción ariba impuesto manera  invoerrechten y accijzen acompaña pa un ahustacion pa esnan di menos recurso pa asina nan por supera momentonan difisil. Neglishando e dolor di nos cuidadanonan e Gabinete Wever- Croes aki a escoge pa impone mas medida riba nos comunidad cu ta den sufrimento caba y a impone un aumento di costo di awa cu 35%, un aumento di prijs di electricidad cu 27% y ta bay impone un BTW di 16- 18% . Cu introduccion di e medidanan aki Gabinete Wever-Croes ta strangula nos economía cu consecuencia devastador pa nos cuidadanonan directamente pero tambe pa comercio na Aruba cu ta depende ariba consumo domestico.  

 

Líder di fraccion di AVP mr. Mike Eman a indica cu Banco central ta indica cu e poder di compra di nos cuidadano nan ta determinante pa e forsa di nos economía y mr. Mike Eman ta cita;

 

Household consumption is readily recognized as one of the key drivers for economic development. More than half of Aruba’s gross domestic production (GDP)depends on the financial position and wellbeing of the households”.

 

Líder di fraccion di AVP a ilustra cu maneho di Gabinete Wever-Croes di impone medida ta strangula e poder di compra di nos cuidadano y tambe strangula e economia di Pais Aruba.

 

Awe e diferencia den maneho y visión ta evidente. E maneho di Gabinete Wever- Croes ta causando hopi tristesa y depresión den nos comunidad. Partido AVP den gobernacion semper a duna prioridad y atención na e poder di compra di nos cuidadanonan. Gobernacion di AVP a percura pa den momento difisil pa introduci Reparatietoeslag pa empleadonan den sector priva y pensionandonan. Mas cu 5 mil famia a ricibi un aumento di bijstand y kindertoeslag pa asina garantisa cu esnan di menos recurso por tin un calidad di bida husto y digno. A reduci BBO cu 1.5% cu a duna un alivio enorme na economia y a stimula e poder di compra di nos cuidadanonan. A percura pa mantene e reducción di accijns riba gasoline pa evita cu esaki ta subi drásticamente. Gobierno di AVP a mehora e posición di nos empleadonan publico dunandonan indexering, najaars-premie y voorjaars-premie. Tur e logranan di un Gobernación di AVP ta duna forsa na e pensamento cu nos no por sigi acepta cu Gabinete Wever-Croes ta conderna nos cuidadanonan na un calidad di bida inferior, mientras cu nan ta malgasta fondonan publico den forma bergonsoso. E enfoke di un Gobernacion di AVP  ta pa mehora e poder di compra di nos cuidadanonan pa asina nan por tin un bida digno y husto, y partido AVP lo keda lucha pa realisa y materialisa e deseo aki di nos comunidad.