Diabierna ultimo na Plaza Nicky Habibe Jr. a tuma luga un homenahe na Sr. Alex Edward Etty Toppenberg. Un bunita anochi cu a conta cu presencia di un cantidad grandi di famia, amigonan y publico. Ademas esnan cu no por tabata presente por a sigui esaki via canalnan di television local y medionan social. Minister di Cultura Xiomara Maduro a hiba un bunita y discurso.
Minister Maduro a sorprende tur esnan presente iniciando su discurso cantando parti di cancionnan di Etty, manera “Baile de Sehu” y ‘Sr. Meneer di scol”.
Un bunita dedicatorio na Etty, un artista cu ta goza di hopi aprecio di su pueblo. Ta conoci cu hopi biaha Etty ta dedica su cancionnan na otro y diabierna anochi e mandatario encarga cu cultura a cambia e rol y a canta pa Etty un rato asina.
Un evento importante aki, cual tabata dedica na nos yiu di tera Alex Edward ‘Etty’ Toppenberg. Nos meneer di scol, artista, cantante, musico y troubadour, nos legendario musico hopi conoci y popular localmente y tambe internacionalmente.
Meneer di scol, deportista y musico
Alex Edward ‘Etty’ Toppenberg a nace cu e vocacion pa bira un meneer di scol y cu e arte di por canta, composita y entretene un publico cu cancionnan den varios idioma, un talento cu un bos unico. Un persona stricto, cariñoso, cu ta persevera, gusta haci joke y ta sumamente orguyoso di su identidad. ‘Rubiano mi ta’ ta su frase popular cu e ta uza, unda cu e bay.
Etty tabata gusta deporte tambe, ya cu ela practica futbol y baseball. Etty ta creyente den alma y curason y ta bishita Kapel na Alto Vista cu su gitara pa canta pa Birgen Maria.
Como meneer di scol basico y secundario, Etty a brinda un bon educacion, cu amor, atencion y a duna un aporte grandi na formacion di varios alumno cu awe ta ocupa funcionnan importante den nos comunidad.
Etty tabatin su manera unico pa e muchanan por siña nan les. Ora un mucha no por a siña e tarea, e tabata conseha nan pa traha un cantica di dje, pa asina nan por a corda e les miho. Su sentimento di amor y dedicacion na musica ela sa di educa y yuda su alumnonan siña nan les, pa medio di musica.
Durante henter siman lo elabora via diferente comunicado di prensa riba e discurso di Minister Xiomara Maduro durante e evento Un Homenahe na Etty Toppenberg.
