Home Local Aruba ta e prome isla den Caribe Hulandes pa conta cu servicio...

Aruba ta e prome isla den Caribe Hulandes pa conta cu servicio regular di British Airways

SHARE

Zomer 2023 ta cuminsa cu dos vuelo semanal
ORANJESTAD – Cu gran orguyo y hopi satisfaccion Aruba Airport Authority N.V. (AAA) por anuncia oficialmente un opcion mas riba e ruta Europeo existente for di Reino Uni. Cuminsando den zomer 2023 lo yama bonbini tambe na British Airways cu su servicio di dos vuelo pa siman for di aeropuerto London Gatwick Airport, banda di nos socio actual TUI UK cu ta opera un servicio temporal for di e punto di acceso aki.
British Airways lo bula pa Aruba durante henter aña riba Diahuebs y Diadomingo cu un stop na Antigua. E vuelo LGW-AUA lo wordo opera cu un Boeing 777-200ER equipa cu 336 asiento, brindando 32 asiento Club, 52 World Traveller Plus asiento y 252 asiento economy.
Aeropuerto di Aruba, den colaboracion cu Aruba Tourism Authority, ta den combersacion cu British Airways desde aña 2015 durante varios conferencia di ruta y na nan oficina principal na London. Durante e ultimo 10 luna, e reunionnan y negociacionnan posterior a intensifica y awor a cristalisa cu por anuncia e servicio aki.
Detayenan di e buelo
Buelo BA2157 Depart London Gatwick 10:00 – Arrive Antigua 13:35
Buelo BA2157 Depart Antigua 14:35 – Arrive Aruba 16:30

Buelo BA2156 Depart Aruba 18:30 – Arrive Antigua 20:15
Buelo BA2156 Depart Antigua 21:15 – Arrive London Gatwick 10:15

Na e momento aki e mercado di Europa ta conta cu servicio di KLM y TUIFly Netherlands, ambos operando for di Amsterdam y tambe TUI Airways cu servicio di temporada durante zomer so for di London Gatwick. Actualmente e mercado Europeo ta representa 14% (YTD July 2022) di e cantidad total di pasahero cu Aerouerto di Aruba ta procesa den 44 vuelo pa luna di juli cu a suma un total di 16.443 stoel. KLM ta opera shete vuelo y TUI NL tres vuelo pa siman, mientras cu TUI UK tin un vuelo operacional temporal.
London Gatwick Airport (LGW) ta un aeropuerto internacional grandi situa cerca di Crawley, West Sussex, Inglatera, aproximadamente 29 miya (47 km) pazuid di London central. LGW a maneha 6.9 miyon pasahero na aña 2021 y prome cu Covid a maneha riba 46 miyon. Gatwick tabata e prome aeropuerto pa tin un conexion di trein principal cu su mesun stacion conectando cu mas stacion di aeropuerto na Europa. Ta tuma 30 minuut pa yega centro di London den trein cu ta sali cada 3 minuut.
British Airways ta un aerolinea global, treciendo hende, luga y culturanan diverso mas cerca di otro pa mas cu 100 aña. Sirbi nan comunidad y nos planeta ta central den tur loke nan ta haci y ta adopta iniciativanan emocionante di sostenibilidad. Na British Airways nan ta na caminda pa crea un futuro mas sostenibel y ta yama esaki nan iniciativa “BA Better World”. British Airways ta opera un di e flotanan mas grandi y moderno di cualkier aerolinea na mundo cu avionnan manera e B777-200ER uza den e ruta pa Aruba, e B777-300, e Airbus 350-1000, e Airbus 280-800 y hopi mas. Actualmente British Airways ta sirbi e siguiente destinonan den e region Caribense: Antigua, Bahamas, Bermuda, Barbados, Islanan Caiman, Republica Dominicana, Grenada, St. Kitts, St. Lucia y Trinidad & Tobago. Nan ta opera no menos di 70 vuelo semanal pa Caribe, cu un capacidad total di 21.083 stoel.
Oneworld ta un aliansa di aerolineanan di clase mundial, comprometi den provee un nivel di servicio halto y combiniente den no menos di 900 destinacion den mas cu 170 pais rond mundo. Pasaheronan ta gosa di un lista di previlegio y recompensa di tur aerolinea participante y sin lubida acceso na riba 620 sala VIP na aeropuerto. E aerolineanan miembro di e aliansa aki ta Alaska Airlines, American Airlines, British Airways, Cathay Pacific, Finnair, Iberia, Japan Airlines, Malaysia Airlines, Qantas, Qatar Airways, Royal Air Maroc, Royal Jordanian y SriLankan Airlines.
CEO di AAA, Joost Meijs, a comenta: Otro logro pa e industria turistico di nos isla cu un servicio permanente entre London Gatwick Airport y Aruba. E introduccion di e servicio directo aki ta un obhetivo cu nos a bin ta traha riba dje y ta encanta cu e esfuerso pa desaroyo di servicio ta duna resultado. Den un sector hopi competitivo, ta esencial pa tin un servicio directo durante henter aña y conexion facil for di mercadonan grandi. Esaki ta un trabou den ekipo y mi ta convenci cu e lo bira un exito!”
Aruba Airport ta orguyoso di por raporta cu e aña aki, di januari pa juli, a conta un total di 775,926 ‘outbound passenger’, mientras cu e procesa un total di 106,791 pasahero for di Europa. Riba su mes Europa awendia ta representa 14% di tur e pasaheronan cu ta yega Aruba. Generalmente, si conta tur mercado hunto, e aeropuerto di Aruba a recupera di januari pa juli 2022 na 91% compara cu aña 2019. Luna di juli so por bisa cu Aruba a recupera 99% den comparacion cu tres aña pasa. E reparticion di mercado total di e areolineanan for di Europa awor ta KLM 66%, TUI NL 21% y TUI UK 12%.