Home » No tin lucha sin sacrificio y no tin sacrificio sin gloria: Tabata danki na e accionnan di Augustus Scur cu Hulanda a habri porta pa scucha e deseo di e pueblo Arubano

No tin lucha sin sacrificio y no tin sacrificio sin gloria: Tabata danki na e accionnan di Augustus Scur cu Hulanda a habri porta pa scucha e deseo di e pueblo Arubano

by Admin
0 comment 139 views

 

 

E luna aki, esta augustus 2022 nos ta recorda cu 45 aña pasa nos pueblo a lanta para pa defende cu alma y curpa su autonomia. Historia ta mustra cu den e eleccion di Staten di dia 17 di juni 1977 MEP a gana den forma aplastante obteniendo 5 di e 8 asientonan. Cu e victoria aki e pueblo Arubano a ratifica e mandato na MEP pa sigui cu e lucha pa libertad di e pueblo. Despues di e victoria aki ningun hende na Aruba por a imagina loke ta bay sosode. E formador di Gobierno Central, sr. Boy Rozendal a maniobra di tal forma pa laga e partido mayoritario MEP for di gobierno, esta sin respeta e decision di e electorado Arubano. 

 

Escalacion di accionnan

Pueblo mirando cu un partido minoritario di Aruba a drenta gobierno Antiano lagando MEP afo, a dicidi bao guia di Betico Croes hunto cu Gobierno Insular y gremionan pa lanta,  protesta y pa respeta e electorado Arubano. “MEP ta un partido di principio y prestigio cu no ta bay mendiga pa drenta gobierno. Entrante dialuna accionnan lo cuminsa. Lo bay tin escalacion di e accionnan, cual lo por desemboca den un independencia total di Aruba”, tabata palabranan fuerte y decidido di nos Libertador e tempo ey. 

 

Dos sindicalista encarcela

Riba un dia manera awe 10 augustus, 45 aña pasa, dos sindicalista, esta Presidente di IOWUA, sr. Chinto Geerman (dfm) y sr. Juan Yarzagaray (dfm) a ser encarcela pa motibo di un pamfleta cu nan a emiti dia 9 di augustus 1977. Den un reunion urgente cu a ser teni e anochi ey na Centro di Bario Noord, a dicidi cu lo bay Warda di Polis na Playa pa exigi libertad di e dos sindicalistanan aki. Hendenan tabata furioso y tabata tira piedra riba e polisnan. Despues a bay protesta dilanti cas di Officier van Justitie Arps. Durante e anochi ey a sigui reunionnan maratonico entre sr. Betico Croes, e lidernan sindical y sr. Arps na Bestuurskantoor. Pero esey no a duna ningun resultado.

 

Aruba den scuridad total

Su dia siguiente, 11 augustus 1977 e sindicatonan den gran mayoria a proclama un welga general caminda a pone trabao abao, a subi caya y unda e sindicato di WEB tambe a notifica gobierno cu lo bay kita coriente y consecuentemente esey a trece problema pa suministro di awa. E welga general a isola nos isla, ya cu e comunicacion via telex a paralisa y e avionnan di ALM tampoco por a baha na Aruba. Henter nos comunidad a keda den scuridad total.

Mas laat den anochi a baha un avion yena cu Riot Comando for di Corsou bao guia di Castillejo Cova cu a bin marcha den cayanan di Oranjestad. E tension a sigui crece y pa dianan largo Aruba tabata paralisa. Durante e protestanan dilanti Bestuurskantoor balanan cayente a cay, a tira riba e jeep di Betico y tambe varios persona a wordo herida y e mesun anochi ey polis a distrui un auto cu dos ciudadano aden banda di Wilhelminastadion. Den tur e acontecimentonan aki e mayornan di Betico Croes a ser humilia, su primo y diferente otro personanan a ser herida y diferente lider di bario a ser persigui. 

 

Delegacion pa Hulanda

Sinembargo e gran mayoria di pueblo no a sucumbi pa tur e intimidacionnan aki y den forma decidido a sigui lucha pa dianan largo. Locual cu a sigui despues ta cu sindicatonan hunto cu politiconan a dicidi cu a base di articulo 26 di Eilandenregeling lo manda un delegacion Hulanda. 

Dia 19 augustus 1977 gobierno a ricibi un telegram di Prome Minister Joop den Uyl confirmando e hecho cu gobierno Hulandes oficialmente lo ricibi un delegacion Arubano. E delegacion encabesa pa Betico Croes a viaha riba e dianan 3 y 4 september 1977 caminda a delibera riba e futuro estatal di Aruba cu representantenan di gobierno Hulandes, partidonan politico, sindicatonan y organisacionnan di dunador di trabao. 

 

Tabata danki na e accionnan aki awe Aruba ta gosa di su Status Aparte, esta un pais autonomo den Reino Hulandes cu su propio gobierno, parlamento, gobernador, Banco Central etc.

Ta p’esey, laga e dianan aki ta dianan di reflexion pa un y tur realisa cu nos libertad, nos Status Aparte no a cay for di cielo, pero cu esaki a ser logra a base di sanger, sodor y lagrima bao liderazgo di e lider indiscutibel Arubano, Betico Croes.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio