Siman pasa diamars y diaranson un boto di patruya Metal Shark di e punto di sosten di Wardacosta na Aruba, den colaboracion ku unidatnan di avionnan di Wardacosta, a detene dos boto, durante cual un total di casi 500 kg contrabanda a keda confisca. Dos Colombiano, un Venezolano, y dos Arubiano a keda detene dene caso aki. E droga y e sospechosonan a keda entrega na e Unidat contra Crimen Organisa di Cuerpo Polisial di Aruba, ku ta sigui ku investigacion di e casonan.
Ayera Zr.Ms. Groningen, cual ta nabegando pa Wardacosta Caribe Hulandes, a bolbe interesepta un transporte di droga. Esaki a keda hasí pa medio di coordinacion di e Centro di Operacion Maritimo (MOC) en cooperacion ku e helicopter y avion di Wardacosta. Durante e accion aki mas ku 1000 kg di kontrabanda a keda confisca y a detene cinco Venezolano. E contrabanda y e sospechosonan a keda entrega na Cuerpo Polisial di Corsou, ku lo sigui ku sobra investigacion.
Ku e ultimo accion aki, e conteo di e casonan di Wardacosta a yega na seis den un lapso di tres siman. E total cantidat di peso di e contrabanda ku a confisca durante e seis accion nan aki ta yega na kasi 4000 kilo. E lucha kontra traficacion di droga ta sosede den bon cooperacion ku Wardacosta su partnernan local den cadena hudisial, manera e diferente cuerponan polisial di Corsou y Aruba, BOT K-9 di KIA, Guarda nos Costa, Douana y Servisionan di Imigracion.