Ayera Gabinete Wever-Croes, Minister Endy Croes, a tene un rueda di prensa pa elabora riba Premio Excelencia den Deporte. A toca mi un oportunidad sorpresa pa dirigi algun palabra durante e actividad.
Den mi speech mi a papia di e manera con mi amor pa deporte a nace y crece. Mi amor pa deporte a echt nace ora mi a cuminsa traha na Ministerio di Labor, Cultura y Deporte na 2002 y e la crece ora mi tabata presidente di Weganan di Reino di aña 2003 pa 2010.
Durante e periodo aki mi a siña conoce e mundo deportivo na Aruba hopi di cerca, a cera conoci cu e federacionnan, e boluntarionan y nos deportistanan.
Na mes momento mi a siña y experiencia:
– E Balor di deporte pa nos pais;
– E Balor di deporte pa formacion di un nacion;
– E Balor di deporte pa formacion y desaroyo di e deportista y;
– E Balor di deporte pa e famia.
Pesey mes semper mi a sostene y ta aporta na proyectonan cu tin como meta pa promove deporte y crea estimulo y baloracion pa nos deportistanan. Premio Excelencia den Deporte ta un di nan. Den pasado e tabata yama Simplemente Deporte y mi a traha hopi di cerca cu e organisacion e tempo ey.
E aña aki lo tin 141 nominado, pa loke ta trata e añanan 2019 y 2021. Mi a enfatisa e hecho y a dirigi mi mes na e hobennan, bisando cu nan mester sinti nan mes honra y orguyoso di a keda nomina pa nan Federacion. Pasobra esaki ta muestra cu nan sacrificio, dedicacion, disciplina y logronan a resalta.
Na mes momento mi a gradici y felicita e mayornan cu nan sosten y guia brinda na nan yiunan. P’ami nan tur, cada un riba nan mes, ta un ganado(ra) y a felicita nan pa esaki tambe.
Mas cu claro mi a aplaudi e hecho cu Minister Endy Croes ta continua cu e premio aki y un biaha mas nos deportistanan lo bay experiencia un anochi di gala specialmente organisa pa nan.