En conexion cu 50 aña di Checkpoint Color Aruba y celebracion di 77 aña di bida y salud di sr. Rob Vermeer.
ORANJESTAD: Diaranson mainta Minister Endy Croes hunto cu colega Minister Xiomara Maduro y Minister Glenbert Croes tabatin e honor pa presencia e inauguracion oficial di e exposicion di fotografia ‘Fifty Years of Perpetual Light’. E proyecto ta un exposicion di fotografia di sr. Rob Vermeer su 50 aña documentando fotograficamente Aruba, di arte y cultura pa turismo, di naturalesa pa momentonan iconico cu Aruba a experiencia. Cu un seleccion di 200 fotografia, e proyecto 50 aña di ‘Luz Perpetuo’ ta duna honor na un archivo y coleccion grandi di fotografia cu a ser tuma desde añanan 70 door di e fundado di Checkpoint Color Aruba, e prome negoshi di fotografia estableci na Aruba. Cu e proyecto aki Checkpoint Color a rescata negativonan pa asina duna luz di nobo na fotografia historico di e ultimo 50 aña di Aruba. E mandatario a sigui bisa cu sigur e tabata un fecha hopi special y memorable pe famia unda cu a celebra tambe sr. Rob su 77 cumpleaños.
Concluyendo Minister Endy Croes ta felicita sr. Rob y sra. Marjorie como tambe nan yiunan Fernando y Cher cu un bunita exposicion en conexion di e 50 aña di Checkpoint Color Aruba. Un exposicion impresionante cu sigur pueblo di Aruba mester pasa admira. Masha masha pabien na famia Vermeer.
