Despues cu ayera mainta Federacion di Trahadornan di Aruba (FTA) a yama un accion di protesta bou di su miembronan emplea na Supermercado Ling & Sons, nos ta contento di por informa cu awe merdia partidonan a yega na un acuerdo pa cu e Contrato Colectivo di Trabao (CAO).
Ayera merdia partidonan a acorda cu lo para e accion bou condicion cu awe merdia lo bai mesa pa haci un otro intento pa yega na un entendimento. Durante e reunion di awe merdia partidonan a acorda cu lo pone e incidente di ayera tras di lomba y cu conhuntamente lo traha di forma respetuoso y constructivo cu otro den beneficio di tur esnan envolvi.
Di e forma aki tambe a logra yega na un acuerdo pa cu e proximo CAO, cual lo tin un duracion di 3 aña y den cual e empleadonan lo conoce un aumento general structural di salario como tambe un asina yama “signing bonus”. Durante e siman aki lo concretisa e acuerdo mediante firmamento di e CAO 2022-2024.
Di parti di FTA nos kier gradici gerencia di Ling & Sons pa e postura constructivo cu a opta pa tuma despues di e impase, como tambe nos kier duna un palabra di danki na cada un di nos miembronan cu no solamente a para firme tras di nos como sindicato pero tambe ta sigui pone nan confiansa den nos organizacion pa defende nan interesnan laboral.
Den UNION tin FORSA!!!