Home Politics Grupo di studiantenan a yega Hulanda

Grupo di studiantenan a yega Hulanda

SHARE

 

 

Pa prome biaha Prome Minister di Aruba presente pa saluda e studiantenan

 

Den Haag  – Cu vuelo 765  di KLM a yega awe 2 di augustus un cantidad di 90 studiante 

Arubano pa sigi un estudio avansa na nivel di HBO of Universidad na Hulanda. Esaki ta e prome vuelo cu studiante cu ta yega Hulanda. Ta trata aki di studiantenan cu ta bai studia na Rotterdam, Arnhem, Nijmegen, Wageningen, Enschede, Deventer, Zwolle, Groningen, Leeuwarden, Eindhoven y Maastricht. 

 

Na Schiphol e studiantenan pa prome biaha a wordo saluda pa Prome Minister mr. Evelyn Wever-Croes. Tambe Minister Plenipotenciario Suplente mr. Ady Thijsen y directora a.i. di Arubahuis drs. Glenda Hernandez a yama e studiantenan bon bini. Un delegacion consistiendo di functionarionan di Departamento di Enseñansa di Arubahuis, studiementor y miembronan di e POC (Plaatselijke Opvangcommissie) presente den sala di yegada di Schiphol.

 

Despues di casi un ora y mei cu e avion a baha e studiantenan por a piki nan maleta y a sali pafor di e sala di yegada. Akinan na un forma bon coordina y organisa a haya instruccion di personal di Arubahuis, mentornan y miembronan di e POC unda nan mester a para den grupo pa warda nan turno pa bai na e bus cu lo hiba nan na nan ciudad di estudio. Tabata tin hopi atencion di prensa Arubiano pa e yegada. Manera tur aña Robby Schouten di e programa Leu foi Cas a haci grabacion y entrevistanan pa su programa Leu foi Cas. Un ekipo di Telearuba cu ta na Hulanda a haci grabacion pa Telenoticia. Roy Kelly di e website Arubiano.eu a saca hopi potret di e yegada.

 

Mayan e grupo aki di studiantenan lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia nesesario den nan ciudad unda pa sigur cuater aña of mas nan lo biba y studia.

E prome aña e studiantenan ta ricibi guia di e studiementor, pero pa e resto di su estudio e ta cai bou di Arubahuis.

 

Riba e Facebook pagina di Arubahuis y Onderwijszaken lo tin potret y videonan di e yegada di e grupo di studiantenan.

 

Nota pa redaccion: E potretnan ta cortesia di Arubahuis