Oranjestad, Aruba – 2 Augustus, 2022: Aruba Hotel & Tourism Association a tuma nota di e anuncio cu tarifanan di awa y coriente na Aruba a hisa substancialmente pa henter comunidad. Considerando e realidad di inflacion cu nos tur ta experienciando caba como consecuencia di e problema global cu cadena di suministro y e prijs di petroleo, por spera cu e ahuste di tarifa di utilidad lo hisa costo di bida y costo di commercio ainda mas y hasi Aruba hopi mas caro pa un y tur. Si gobierno dicidi di introduci un tarifa halto di BTW cu un reforma fiscal na 2023, esey lo crea un tormenta perfecto pa nos isla cu lo multiplica e efecto negativo di e 3 factornan (inflacion global, tarifa di utilidad, y tarifa halto di BTW) riba nos economia y bida diario di nos residentenan.
AHATA ta di opinion cu pa motibo di e inflacion enorme den nos futuro sercano, ta prudente pa reevalua e tarifanan di BTW cu gobierno tabatin planea pa introduccion na 2023 y pone mas atencion riba corta gasto gubernamental pa evita di crea un situacion mas intolerabel pa Aruba.