ORANJESTAD: Minister Endy Croes ta aplaudi y alabes felicita Colega Minister di Salud Publico Sr. Dangui Oduber cu e anucio oficial cu a scrap definitivamente e ‘eigen bijdrage’ di AZV.
Lands Pakket F3 ta cubri cuido medico:
Durante Covid 19 Hulanda a pone hopi condicionnan politico pa Aruba, Curaçao y Sint Maarten den e proceso cu a presta e islanan hopi miyon di florin pa por a surpasa e temponan dificil. Hulanda a haci esaki mediante entre otro Liquiditeits Steun. Algun otro di condicionnan a bini a traves di Landspakket unda islanan mester pasa den reformanan grandi pa por garantisa sostenibilidad pa futuro. Den Landspakket bou di e letra F3 esaki a cubri parti di cuido medico y aki Hulanda a para fuerte entre otro cu den AZV mester corta 60 miyon pa aña. E 60 miyon aki nunca por cierto a wordo substancia cu argumento pa Hulanda pero sin mas ta un condicion riba mesa. Como parti pa yega na 60 miyon Hulanda ta exigi pa bini cu un ‘eigen bijdrage’. Desde tempo di AVP esaki ta riba mesa pero Minister Oduber no a kere den esaki como cu esaki lo causa un dolor y peso financiero adicional pa pueblo. Hunto a keda busca otro alternativa pa cubri e deseo di Hulanda y AVP riba e tema aki.
Profesor Hubben y Batenburg a produci un rapport:
Den rapport di Profesor Hubben y Batenburg (BC zorg) tin diferente recomendacionnan importante con pa baha gasto door di traha mas eficiente. Recomendacion manera traha mas strategico den forma di cooperacion cu otro Hospitalnan na Curaçao, Sint Maarten y den region por yuda den esaki. Pues forma un aliansa. Den luna di juni a formalisa e Dutch Caribbean Hospital Alliance. Trahando mas eficiente y den colaboracion estrecho ta logra baha gasto y scapa mas placa. Cambionan entre otro den e Landsbesluit di verpakte geneesmiddellen tambe lo produci un besparing segun calculo di 7-8 miyon cu ta minimo 2 bes mas cu ‘eigen bijdrage’ cu CAFT y AVP tabata insisti pa introduci. Cu esaki Minister Dangui Oduber ta logra un paso firme pa combense CAFT y Hulanda cu lo scrap e eigen bijdrage como cu tin otro manera pa baha e gasto cu pasonan mas grandi sin mester mishi cu e cartera di e ciudadano. Minister Endy Croes ta felicita Minister Dangui Oduber cu e gran logro aki unda a logra convence CAFT y Hulanda tambe riba e tema aki. Alabes ta felicita Gabinete Wever Croes II cu e logro aki. Hunto nos lo nabega y surpasa tur obstaculo pa nos por sali cu exito for di e pandemia y por para fuerte bek riba nos propio pia den futuro.