A trata diferente punto di interes pa studiantenan cu ta bai sigui studia na Merca.
ORANJESTAD: Den un encuentro ameno Minister Endy Croes a reuni cu representantenan di EducationUSA Aruba, sra. Jo-Anne Croes y sra. Marilis Becker. Durante e reunion a trata diferente puntonan importante y di interes pa studiantenan cu ta continua cu nan estudio na Merca. EducationUSA Aruba ta duna informacionnan necesario na studiantenan cu ta desea di continua cu nan estudio na Merca. EducationUSA Aruba tin un lista di 4 mil college / junior college acredita y ta guia studiantenan cu tin e deseo di studia na Merca kico ta e proceso y tur e rekisitonan cu nan tin mester. Ta recomendabel pa e studiante cuminsa prepara un aña adelanta pa nan por cuminsa ricibi guia y haya un bon ‘match’ pa cual college/ junior college ta pas cu nan. EducationUSA Aruba ta yuda e studiante ta busca un scol na Merca caminda e Arubalening ta yega pa cubri e scol. Como tambe EducationUSA Aruba ta enfoca riba studiantenan cu tin talento den deporte no solamente pa haya un Arubalening, pero por ricibi un beca depende di talento di e studiante. Un punto positivo di studia na Merca ta nan programanan deportivo cu ta hopi mas miho organisa cu Hulanda, sigur e ta di balor agrega pa studiantenan cu tin talento deportivo. Minister Endy Croes ta gradici EducationUSA Aruba pa habri caminda di guia, preparacion y pa crea oportunidadnan pa nos hobenan cu ta bay studia den exterior.