ORANJESTAD – Awe mainta Hues di Corte di Husticia a condena e homber B.P. na 6 aña di prison cu ta igual na loke Fiscal a exigi dia 8 Juli 2022. Ta asina cu psycologo ta considera B.P. un sadista sexual y cu e ta responsabel pa su actonan.
ARUBANATIVE por a compronde cu den sala di Corte e victima dama K. a grita e señora di B.P. cu ta pa su culpa pasobra el a gaña.
Dia 8 di Juli 2022, Fiscal a bisa Hues cu e no ta haya cu K. a duna permiso sino ta bou di presion di B.P., K. tabata laga B.P. haci loke e kier. E ta haya cu premedita B.P. a maltrata, viola, menaza e dama K. El a mustra cu Psycologo ta mustra cu B.P. ta responsabel pa loke el a haci. Segun Corte Supremo, haci tattoo di e forma aki ta wordo considera como maltrato severo. E marcanan cu K. tabatin di e maltrato por wordo considera como maltrato severo.
Fiscal a exigi 6 aña di prison, kitando e tempo cu B.P. ta sera den KIA.
SENTENCIA
Den sala di Corte tabata presente e dama K. y e señora di B.P., abogado mr. Mohamed, Fiscal y Hues, mientras cu B.P. tabata den un oficina na KIA. Hues via video conference, a bisa cu e ta haya legalmente proba cu B.P. a haci practicamente tur e acusacionnan. Hues a bisa cu solamente e acusacion di sicratriznan cu no por wordo considera herida severo.
Hues a bisa cu e ta haya legalmente proba cu B.P. a maltrata e dama K. cu taser y menaza cu arma no di berdad cu morto varios biaha. K. no tabata sa cu e arma no ta di berdad. Esey a causa panico serca K. Hues ta haya cu B.P. a viola e dama K.
NO KERE CU VICTIMA
Pa loke ta e hecho cu e dama K. ta bisa cu el a duna B.P. permiso pa haci tur e cosnan cun’e, Hues a bisa cu e ta pone un banda e declaracion di K. Hues a mustra cu e declaracionnan di K. na Polis ta mustra cu e maltratonan di B.P. ta contra su voluntad. K. a declara cu esakinan ta reglanan di B.P. Hues a mustra cu K. a declara cu e tabatin miedo di B.P. pasobra B.P. a menace cu arma. Tambe el a bisa cu no tabatin ningun palabracion cu e ta wordo maltrata door di B.P. Hues a mustra cu dia 7 Januari 2022, dia di detencion di B.P., mama di K. a bisa cu K. a bis’e cu B.P. a exigi pa K. bay serca dje sino B.P. ta kap e. Tambe K. a bisa e mama cu B.P. a menaza cu lo tir’e mata. K. a bay sconde serca un amiga. Hues a sigui mustra cu dia 7 Januari 2022, e prima di K. a mira K. ta hopi nervioso y K. a bis’e cu B.P. a bisa cu lo kap e. E dia ey K. a conta Polis cu e no por mas cu e relacion cu B.P. y cu B.P. a bis’e cu e lo kap’e 3 biaha. El a bisa Polis cu B.P. a menace cu un arma di candela.
Hues a remarca cu si un hende ta laga haci tur cos cu e mes ta gusta, pakico 7 Januari 2022 el a bay den panico. E no ta logico! El a mustra cu dia 14 Februari 2022, K. a duna declaracion na Polis yorando y un dia despues e ta manda un carta na Fiscal cu tur cos a sosode cu su permiso y cu e ta hala su declaracion aden.
Hues ta conclui cu e no ta kere loke K. a duna permiso pa B.P. maltrat’e.
TATTONAN CONSIDERA MALTRATO SEVERO
Hues ta haya cu e tattoonan cu B.P. a haci riba curpa di K. tabata contra voluntad di K. El a mustra cu K. a yora na Polis cu door di e tattoonan ningun homber lo kier ta cun’e. Hues a mustra cu segun sentencia di Corte Supremo, e forma di haci tattoo ta wordo considera maltrato severo. Tambe e penetracion brutal den parti patras di K. cu a keda sangra te cu mester a hib’e hospital, ta wordo considera maltrato severo. Hues tambe ta haya proba violacion.
Hues pa cu e castigo, a tene cuenta cu B.P. a pone un persona sufri. Hues ta haya cu B.P. solamente tabata pensa pa satisface su mes y no con e dama K. lo sinti. El a tene cuenta tambe cu B.P. a pone tattoo riba K. sin pensa riba K. su futuro. Hues a mustra cu B.P. ta casa y tin yiu pero K. no. Hues tambe a tene cuenta cu raport di psycologo. Hues a bisa cu el a keda preocupa pasobra B.P. no a mustra cu e ta compronde cu loke el a haci no ta bon.
Hues ta haya e castigo cu Fiscal a pidi na su lugar. El a condena B.P. na 6 aña di prison.
SEÑORA A GRITA E VICTIMA
Ta asina cu tanto e victima como e señora di B.P. a cuminsa yora ora Hues a bisa cu e ta condena B.P. na 6 aña di prison. Despues cu Hues a nenga e victima pa papia y a lanta bay, e señora. a keda sinta yora. E victima a bay serca dje y bis’e pa nan sali bay. E ora e señora a grit’e e victima K. cu esaki ta bo culpa pasobra abo a gaña. E señora a sali bay y abogado mr. Mohamed a keda warda na e porta di sala y bisa K. cu e mester sali. Un rato despues K. a sali.