ORANJESTAD – Diaranson merdia, minister di Husticia y Asuntonan Social Rocco Tjon a reuni cu Sindicato di Polis di Aruba (SPA) y Departamento di Recurso Humano (DRH). Manera ta conoci SPA a trece algun puntonan padilanti di e “bevorderingen” pa loke ta trata Agentenan Policial. Esaki ta un tema cu semper a haya, y tin e atencion di ministerio di Husticia y Asuntonan Social.
Durante e reunion aki, a ilustra cu for di ministerio a traha riba mas di 140 peticion pa bevorderingen actual, mayoria cual tawata atrasa y awo a wordo trata. Banda di esaki, SPA a presenta alrededor di 30 caso specifico unda cu hunto cu DRH a yega na palabracionnan. Importante pa menciona ta cu di e 30 casonan cu a wordo presenta durante e reunion, ocho di nan ya ta den proceso di wordo trata y ta na gabinete di Gobernador y e fecha specifico cu esaki a bay gabinete di Gobernador a wordo comunica na SPA. Banda di esaki, ainda tin un grupo di colega cu nan peticion pa bevordering nunca a yega na ministerio y DRH, pues SPA lo mester bay averigua unda e peticionnan aki ta. DRH a indica cu dentro di dos siman e contesta riba e bevorderingen di e resto di e grupo, cual mayoria ta forma parti di e casonan cu a wordo trata den e reunion aki lo wordo manda pa ministerio. Ministerio lo traha riba esaki de inmediatamente, pa asina por duna e Polisnan un contesta concreto.
Pa evita cu den futuro por bin un mal comunicacion entre DRH y SPA, a palabra pa reuni un bes pa luna structuralmente, pa asina preveni mal comprendimiento. Adicionalmente, DRH a trece un sugerencia padilanti, caminda lo percura pa un of dos persona cu ta traha na DRH bay sinta na Cuerpo Policial, pa asina yuda y fortifica e procesonan di “HR” na Cuerpo Policial. Por ultimo, e mandatario a indica cu e reunion tawata uno sumamente positivo, caminda a haci palabracionnan concreto y a anota un fecha pa e siguente reunion entre ministerio, SPA y DRH, cual lo ta dia 18 di Augustus binidero.
