Den un bida diario tin diferente aspecto y factor cu ta crea un rutina. Un individuo tin varios rol den bida, asina un persona por eherce e rol di un yiu, un ruman, un trahador, un boluntario of di un mama of tata di famia. Nos kier para keto na e ultimo rol aki, caminda cu tin hopi aspecto ta presenta na momento di forma un famia of di bira un mayor.
Na promer lugar mester corda ariba cuido propio. Na momento cu un famia di 2 bira tres, pues tin un baby a yega den famia, e prioridadnan ta cambia. E “to do list” lo conoce cambio y lo tin menos tempo pa pensa ariba bo mes como individuo. Esaki por bira cu tempo un custumber y por tin consecuencia pa e salud fisico y tambe mental di e mayor. Ta pa esey ta hopi importante pa para keto na tin un bida balansa entre tur e rolnan cu por existi den bida di un persona.
Con pa yega na un bida balansa?
Pa por enfoca na yega na un bida balansa tin algun habilidad cu un persona mester por domina. E prome ta siña bisa NO. Esaki por zona un poco incomodo pa haci pa algun persona, pero mester corda ariba bo mes promer. Tin un dicho na Papiamento cu ta bisa: “Mi no ta bay corta mi nanishi pa bay daña mi cara”. Cu otro palabra no bay complace otronan bisando si pa despues sali perhudica. E di dos ta siña pone limite. Un dia tin 24 ora, ni mas ni menos. Ta importante pa plania hopi adelanta y premira con ta bay traha cu e tempo cu tin disponibel. E di tres ta keda na haci excogencia ora ta trata actividadnan structural social of caritativo. Ta importante pa contribui na metanan comun pero alabes mester corda coordina cuanto di bo tempo ta bay na esakinan.
Semper corda resta tempo pa relaha of kisas practica un deporte cu ta regula e fluho di oxigeno pa e diferente organonan di nos curpa. Despues di un dia ocupa ta importante pa reflexiona y evalua con e dia a bay. Tuma tempo pa analisa e dia pa asina por ahusta of disminui e “to do list” pa asina esaki ta uno mas realistico posibel.
Loke bo planta bo ta cosecha
Si bo ta exigi di un mucha pa tin un balansa entre drumi, haci huiswerk y hunga nos como adulto tin e tarea di ilustra y proyecta esaki tambe. Pues sea semper consciente di locual bo ta duna como ehempel. Corda muchanan ta observa y kisas no ta duna comentario (ainda) pero lo yega un momento caminda esaki lo wordo ilustra of vocifera pa e mucha. Ta pa e motibo aki mayornan y tambe educador tin un tarea importante pa cu formacion di futuro generacion di hoben y adulto.
Pa pregunta con por trece un balansa den bida como mayor Yama 161 cual ta Tienda di Educacion di dialuna pa diabierna entre 8 am – 6 pm. Tienda di Educacion ta specialisa den duna guia y sosten na mayor of educador durante e desaroyo di un menor entre 0 – 18 aña. Tienda di Educacion ta situa den edificio di Centro Pa Hoben y Famia, Sabana Blanco 68-C. Por contact Tienda di Educacion di dialuna pa diabierna via 161, Facebook Messenger of e-mail [email protected]. Pa keda informa like y follow e Facebook & Instagram Page. Bishita tambe nan Website y YouTube Channel pa mas informacion.
Corda, locual cu bo planta awe bo lo cosecha mañan.