ORANJESTAD: Den Cuerpo Policial varios cos no ta bayendo manera e mester ta. Tin di nan tin di haber cu e situacion financiero, pero mayoria di nan tin di haber cu maneho. Den e caso aki bedrijfsvoering, mantencion di edificio, schimmel ta un di e puntonan di preocupacion. Siguridad y salud di nos coleganan ta algo cu constantemente mester percura p’e. Tur cu ta traha den KPA mester haci nan parti pa cuida nan salud, Mando Policial tin su responsabilidad den vision, maneho y organisacion y Ministerio tin su responsabilidad pa cu e direccion cu ta desea pa cuerpo bay y sostene e maneho di cuerpo.
Schimmel sigur tabata un problema pa varios aña. Den edificio di Cuerpo Policial San Nicolas y Oranjestad, principalmente ex warda di polis den Wilhelminastraat. Tin varios coleganan cu a bira malo y hasta a wordo perhudica den nan rechtspositie. Tur a traha den e mesun edificio ey, tur ta di rango halto cu ta pasa gran parti di nan ‘shift’ paden. Ami mes y tambe coleganan a acerca bureau di Minister di Husticia pa cu esaki y e punto aki tin Minister su atencion completo. Minister mesora a tuma accion y na maart 2022 un mantencion extenso a wordo haci na ex warda di polis den Wilhelminastraat. Total Cleaning ta haci limpiesa periodicamente y structuralmente testnan ta keda haci den e edificio na Oranjestad.
E edificio nobo (ex Codemsa) lo keda cla comienso di 2024 na unda e warda di Oranjestad lo wordo muda y ubica akinan. Mi a wordo splica cu e edificio lo wordo gestrip completo, djis skelet ta keda y pa despues construi ful di nobo. Mi a sugeri como punto di prioridad pa tene na cuenta cu tur e puntonan di siguridad manera luz y camera y pa prevencion di schimmel pa instala un bon sistema di aircondition (AC) pa asina tin bon fluho di aire, pa filtra e aire y pa tin mantencion di esakinan.
Mi ta di opinion cu edificio di Cuerpo Policial San Nicolas tambe mester wordo getest, mirando e hecho cu den pasado tabatin problema cu schimmel. Schimmel tin tur caminda, den oficina, den bo camber, vooral ora tin airco cendi henter dia esaki automaticamente ta crea schimmel. No mester ta nada malo tanten cu no ta cierto tipo di schimmel y cu no surpasa cierto cantidad di e schimmel aki. Pa e motibo aki ta importante pa haci un test pa señala si e situacion di schimmel na e warda na San Nicolas ta bou di control.
Pa finalisa ta trabou di Mando Policial pa inventarisa ki mantencion mester na e edificionan y alerta na Ministerio. Un Ministerio no por haci tur e trabou aki como cu tin mas cu 50 departamento/fundacion cu ta resorta bou di dje. Ta mando di e departamentonan mester tuma nan responsabilidad. En berdad ta trabou di Minister pa percura cu su hefenan di departamentonan ta carga nan responsabilidad y duna un servicio optimal na pueblo mirando cu ta e Minister ta keda responsabel pa funcionamento di tur su departamentonan. Pero di otro banda hefenan di departamentonan tambe tin nan responsabilidad mara na nan funcion y cu esakinan mester refleha bek den nan funcionamento, den maneho di e departamento y e servicio cu ta wordo duna na pueblo.