Den Haag, Hulanda:
Recientemente a keda conoci cu un ambtenaar di Gemeente Den Haag añanan largo a falsifica paspoort y esakinan tabata wordo entrega na criminalnan entre otro e criminal mas grandi di Hulanda Ridouan Taghi.
Criminalnan cu un paspoort asina den nan poder, tur cos ta bira posibel pa nan. Fraude cu paspoort ta wordo yama tambe na Hulandes como ondermijning, un terminologia cu sa wordo hopi usa pa e Gabinete Hulandes y tambe pa husticia Hulandes.
Segun dos journalista Hulandes specialisa den crimen, Paul Vugts y Wouter Laumans, e problema ta sinta den e corona di cabes di e sociedad Hulandes.
E problema No ta sinta solamente na banconan grandi, real estatenan y notarionan, pero ta e homber chikito di nos sociedad, un persona cu pa un regalo of algun cien Euro ta check un number di auto pa un criminal, un douane ambtenaar cu ta laga un container pasa den waf of un persona cu ta traha na un compania di aseguro y cu ta check informacion personal di otro persona, tur esaki a cambio di un “regalo”.
Husticia ta sospecha e ex ambtenaar di Gemeente Den Haag Mildred van D. (50) di regla un cantidad di paspoort pa criminalnan entre otro pa Ridouan Taghi. Segun Ministerio Publico ” E tabata un shock pa mira kende nan tur, den e temporada ey facilmente por a yega na un paspoort Hulandes.”
Segun e journalista specialisa den crimen, “Un paspoort asina ta mescos cu un ticket di oro, e criminal por haci tur locual cu nan kier cu ne.” Segun Ministerio publico, Mildred van D. a ricibi un suma di mas o menos 16 mil Euro pa tur e paspoort nan cu e la entrega na e personanan den baho mundo. E 16 mil Euro ey ta net nada, compara cu e balor real cu un paspoort falsifica tin, den e mundo criminal. E balor ta hopi mas halto, e ta wordo calcula den direcion di algun 100 mil Euro.
Mildred van D. di 50 aña a traha for di 2009 pa 2014 na Gemeente Den Haag. Den e periodo aki e la entrega mas di 20 paspoort falsifica na criminalnan. Den e paspoortnan aki tabata tin nan potret pero e informacion personal tabata falsifica.
Mildred a wordo cumpra door di e conocido traficado di droga Faysal N. (40). Faysal actualmente ta encarcela pa su envolvimento den un caso grandi di traficacion di droga y secuestro violento na Alemania.
Segun ministerio publico e paspoortnan a wordo entrega na 22 criminal entre otro na Ridouan Taghi. Na 2019 Ridouan a wordo extradita for di Dubai pa Hulanda. Un otro criminal Naoufal alias Noffel F. durante su detencion na Dublin tambe tabata tin un paspoort falsifica den su poder.
Tambe Mustapha ‘Amator’ di Amersfoort kende ta un dealer grandi di cocaina a haya un paspoort falsificia. Na 2017 den e cuidad Marrakech na Maroco, e la sobrevivi un intento di asesinato riba su persona. E dos sicarionan a mata un homber inocente, yiu di un Hues. Ministerio publico ta sospecha cu Ridouan Taghi tambe ta tras di e likidacion aki.
Tambe na Augustus 2014 Samir Bouyakhirchan kende a wordo likida na Spaña y su ruman Samir ambos tabata tin paspoort geclone. E criminal Hulandes, Ali Akgün cu a wordo tira fatalmente na Istanbul tambe tabata usa paspoort Hulandes falsifica.
Mildred van D. ta deteni, dia 11 di Juli ultimo, durante e tratamento pro-forma, Mildred no tabata tin un abogado pa represente den Corte. Na comienso e no a haya Rechts bijstand, pa motibo cu e o tabata tin suficiente entrada pa paga un abogado, pero despues esaki a cambia, pa motibo cu su caso ta basta complica.
Den corte Mildred van D. a bisa hues cu e no sa di unda e lo mester bay saca placa pa paga un abogado.
Pa motibo cu e dossier huridicamente ta basta complica, pa e motibo aki corte a bay di acuerdo pa e haya un abogado cu lo wordo subsidia. Abogado Max van Blanken a bira abogado defensor di Mildred van D.