ORANJESTAD – Siman pasa Prome Minister Evelyn Wever – Croes a biaha pa Hulanda. Durante su biahe personal riba propio gasto, a haci uzo di e oportunidad pa planifica reunionnan importante pa Aruba. E prome reunion cu a atende tabata cu Secretario di Estado Alexandra van Huffelen tocante e pago di 5% bek na empleadonan publico. A pesar cu no a logra convence Hulanda pa e pago por tuma luga, Gobierno a cumpli cu e promesa haci na empleadonan publico y a paga e 5%.
Desde fin di aña 2021 Gobierno di Aruba a compromete pa cuminsa reduci e recorte di salario y paga e 5% bek na empleadonan publico desde e di dos mita di aña en adelante (desde juli 2022). Pa logra esaki a traha duro pa percura cu tin fondonan y a inclui esaki den e presupuesto. Prome Minister Wever – Croes a remarca cu a prefera cu tabatin sosten di Hulanda ora cu a paga esaki, pero lamentablemente esaki no tabata e caso. No obstante, cargando e responsabilidad como gobernantenan di Pais Aruba, y reconociendo e problemanan socio-economico cu tin na Aruba, e necesidadnan cu tin den comunidad y e derecho cu empleadonan publico y semi- publico tin, a dicidi di cumpli cu e pago.
Durante di e reunion entre Premier Wever – Croes y Secretario di Estado Alexandra van Huffelen, a trata diferente otro tema. Entre otro e conseho di CFT pa duna Aruba un ‘aanwijzing’ y a haci palabracion con por evita esaki.
Den cuadro di e palabracionnan haci cu van Huffelen, Prome Minister Wever – Croes a reuni tambe cu sr. Raymond Gradus di CAft na Hulanda na Arubahuis. Na e ocasion a papia di e conseho di aanwijzing y locual Aruba ta haciendo pa bin cu cambio na e presupuesto. Manera ta conoci na Aruba, tur aña na mita di aña ta cuminsa prepara pa cambio na presupuesto. Motibo di esaki ta pasobra ora cu traha riba e presupuesto na comienso di aña, ainda no sa kico exactamente ta bay pasa durante di aña. Pero e biaha aki e trabounan a conclui un poco mas trempan, y ta mustra cu e deficit cu tin pa e aña aki (cual ta motibo di conseho pa aanwijzing) por baha considerablemente te casi na mita di locual e tabata, Prome Minister a informa.
Adicionalmente intercambia riba trabounan adicional cu tin cu haci y a scucha opinion di CFT. Den cuadro di e trabounan aki a realisa un reunion virtual cu Ministernan encarga, pa asina cuminsa tuma e diferente accionnan.
Prome Minister Wever – Croes a expresa cu e reunion a bay bon y e meta ta pa kita e conseho di aanwijzing for di riba mesa. Esaki ta loke a palabra cu Secretario di Estado Alexandra van Huffelen y tambe sr. Raymond Gradus di CFT.
E siman aki y otro siman Prome Minister lo bolbe reuni cu diferente secretariadonan y teamnan cu ta prepara e calculacionnan financiero.
Por ultimo, Prome Minister a enfatisa riba e importancia pa keda enfoca riba tur e trabounan positivo cu ta realisando pa comunidad di Aruba, y no riba e storia cu oponentenan politco kier crea pa dividi comunidad. Prome Minister y Gobierno lo sigui concentra riba locual ta importante pa Aruba na e momentonan aki y p’esey a pesar cu ta na Hulanda pa motibo di un biahe familiar riba gastonan propio, a percura pa cumpli cu obligacionnan di trabou cu mester a tuma luga, na bienestar di comunidad.
‘Ban concentra riba cosnan positivo y importante pa nos pais. Aruba ta den proceso di recuperacion y no mester nada pa tranca e recuperacion aki,’ Prome Wever – Croes a termina bisando.
