Ambtenaarnan di diferente gemeente di Hulanda a falsifica un cantidad di paspoort pa criminalnan grandi
Mientras cu e Hulandesnan ta asina ocupa ta combati corupcion y criminalidad na e islanan di Reino Hulandes den Caribe, na Hulanda pa añanan largo e baho mundo Hulandes tabata fiesta cu paspoort Hulandes, anto bou di nan wowo.
Utrecht, Hulanda
Segun e Corant Parool, e caso aki a cuminsa mira luz di dia na final di 2014, na momento cu un homber a bay polis despues cu su paspoort sin ningun motibo a wordo blokea y registra como perdi. Polis a conseha e homber pa bay na e balie di Gemeente Utrecht, caminda ta atende cu asuntonan di paspoort. Aki e la contanan cu su paspoort a wordo blokea y a wordo registra como perdi, mientras cu su persona no a pidi pa esaki, mesora a cuminsa un investigacion interno na na Gemeente Utrecht.
Durante e investigacion a bin sali na cla cu lo tabata trata di un mucha homber hoben cu tabata coriendo stage na e gemeente di Utrecht. E hoben a wordo poni como un posibel sospechoso den e caso aki. Segun nan na un forma hopi simpel e stagiaire tabata sa di desvia di e proceso normal, cu cada paspoort mester pasa cerca varios ambtenaar pa control cu e la wordo entrega, pero e stagiaire aki a haya un forma hopi facil con pa evita cu esaki mester sosode, door di pone cu e paspoortnan aki tabata pa casonan di emergencia.
Na e forma aki den 3 luna di tempo e mucha homber aki a clone 13 paspoort pa personanan den baho mundo (criminalnan).
Un di e paspoortnan falsifica aki a wordo haya den poder di Naoufal F. Alias Noffel, e la wordo deteni riba 16 di April 2016 na Dublin (Ierland). Na momento di su aresto e tabata tin e paspoort falso(geclone) aki riba dje. Naoufal F. mientras tanto a wordo sentencia pa bida largo, relaciona cu su envolvimento den diferente casonan di likidacion. Segun husticia Hulandes, Noffel tabata fungi como tussenpersoon, esta cu e tabata busca sicarionan pa ehecuta likidacionnan den baho mundo.
No ta solamente paspoortnan a wordo falsifica (geclone) di personanan cu no tabata na altura di kiko tabata pasando cu nan paspoort, pero tin personanan cu ta huur nan paspoort cu criminalnan. Durante e investigacion di e caso 26KOPER a bin sali na cla cu un homber tabata wordo paga tur luna fielmente un suma di mil Euro, door di un criminal pa usa su paspoort. Durante e investigacion aki a bin resulta cu tabata trata di e criminal mas grandi den historia di Reino Hulandes, Ridouan Taghi. Durante su detencion na 2019, ainda e tabata tin e paspoort aki den su poder. Actualmente tin un investigacion andando relaciona cu fraude serio aki na diferente gemeente y tin varios ambtenaar na e gemeentenan aki cu ta wordo sospecha di ta envolvi den falsificacion di paspoort.