Home Corte Homber cu a tira dilanti club nocturno condena na 6 aña di...

Homber cu a tira dilanti club nocturno condena na 6 aña di prison

SHARE

 

ORANJESTAD – Hues di Corte di Husticia ta haya e  homber Z.R.T.(23) culpable di a tira riba 25 Januari 2022 dilanti Blue Moon riba un persona.

ARUBANATIVE por a compronde cu Hues a confirma e exigencia di Fiscal, 6 aña di prison pa Z.R.T.

FISCAL SU PUNTO DI BISTA

Tratamento di e caso a tuma lugar algun siman pasa caminda Fiscal a bisa cu Z.R.T. ta admiti di a tira dilanti Blue Moon.

Na opinion di Fiscal, riba video di seguridad por mira kico tur a pasa. Por mira cu Z.R.T. tabatin un pistool color nikkel y a tira den direccion di e homber cu a core bay. Despues el a tira e arma afor y ta bay bek Blue Moon caminda el a wordo deteni. Fiscal a bisa cu no por mira cu ta dos hende manera Z.R.T. ta bisa, lo a saca arma p’e. Fiscal ta haya cu aki no por papia di cu Z.R.T. a actua den defensa propio. Fiscal ta haya cu Z.R.T. por a herida otro hendenan cu tabata para ey banda. E ta considera loke Z.R.T. a haci ta un intento di mata mirando cu Z.R.T. a dirigi e arma riba e persona y a tira diferente biaha. Fiscal ta haya cu Z.R.T. tabatin un arma den su poder.

NO A TIRA RIBA UN CAS

Pa loke ta e tiramento na Pindastraat, Fiscal a bisa cu esaki a sosode algun ora promer cu e incidente na Blue Moon. A haya 3 huls di balanan y impacto di bala riba e cas. Nan ta bisa cu un scooter color blauw y un brommer a pasa y tira. Un di e personanan tabatin cabey rasta. A mira cu e arma ta color di nikkel cu ta mesun color di arma cu Z.R.T. a usa na Blue Moon. Sinembargo, Fiscal ta haya cu no tin suficiente prueba cu ta Z.R.T. ta esun cu a tira. El a pidi Hues pa declara Z.R.T. liber pa esaki.

ARMA UN PROBLEMA SERIO

Fiscal a mustra cu posecion di arma di candela ta un problema hopi serio na Aruba. Hopi hoben ta cana arma. Ta hopi caso di tiramento ta sosode y hasta tin casonan di matamento. El a bisa cu Ministerio Publico a aumenta castigo pa posecion di arma di candela. E ta haya cu Z.R.T. a tira na un lugar publico, manera Blue Moon y esey ta bira un asunto mas serio. El a exigi 6 aña di prison.

SENTENCIA

Hues via video conference a bisa cu, mescos cu Fiscal, e no ta haya Z.R.T. culpable di a tira riba un cas na Pindastraat. El a declara Z.R.T. liber pa e acusacion aki.

Pa loke ta e tiramento dilanti Blue Moon, Hues ta haya Z.R.T. culpable di intento di mata door di tira riba un persona no conoci. Hues a bisa cu Z.R.T. tambe ta culpable di resisti contra su detencion. Hues a sigui bisa cu e ta haya proba cu Z.R.T. tabatin un arma di candela cu bala.

NO DEFENSA PROPIO

Hues a rechaza e defensa di abogado mr. Zara, cu Z.R.T. a actua den defensa propio. Hues ta haya cu no tin ningun indicacion concreto cu e otro persona lo tabatin un arma di candela y a saca esaki pa Z.R.T., manera Z.R.T. ta pretende.

Na opinion di Hues, si esey tabata e caso, no ta acceptabel cu Z.R.T. a tira den direccion di e persona, pa defende su mes. For di video di seguridad por mira cu ta Z.R.T. y un otro persona tabatin e persona wanta y cu Z.R.T. a dal’e cu a arma na su cabez. Ora cu e persona a logra los y core bay, Z.R.T. a tira riba dje.

Na opinion di Hues, e no ta haya cu por papia aki di cu Z.R.T. a wordo menaza door di e persona. El a bisa cu e video di seguridad, ta mustra mas bien cu ta Z.R.T. a cana bay riba e persona y busca confrontacion. Ta Z.R.T. a dal e persona cu arma na su cabez y despues a tira riba e persona riba un distancia cortico. Na opinion di Hues, esaki ta mustra cu ta Z.R.T. a ataca e persona. E no ta mira cu aki por papia di defensa propio.

CASTIGO

Pa cu castigo, Hues a bisa cu e ta tene cuenta cu Z.R.T. a tira riba un persona na un lugar publico caminda tabatin hopi hende presente. Ta puro suerte cu ni e persona y ningun hende a wordo herida. Hues a mustra cu e victima den caso asina, ta keda pa tempo largo cu trauma. E caso aki ta causa sentimento di inseguridad y intrankilidad den comunidad.

Hues tambe a mustra cu door cu Z.R.T. a resisti contra su detencion, el a haci e trabou di agentenan di Polis dificil y ta mustra un falta di respet pa agentenan di Polis. Tambe Hues a tene cuenta cu anterior Z.R.T. a haya condena pa violencia y posecion di arma. Hues ta haya e exigencia di Fiscal na su lugar y a condena Z.R.T. na 6 aña di prison.