Durante conferencia di prensa, di dia 22 di juli 2022 minister Ursell Arends a contesta riba e pregunta di 24ora tocante e filternan di e insinerado cu “si tur cos ta bon e filternan tin tanto ora cu por opera, despues di esaki e filternan mester wordo cambia y cu e siman aki mes e ininerator ta para pa motibo cu filter nobonan den cargamento tin vertraging y in insinerado ta para pa warda filter nobo wordo instala pa por reanuda su funcion.”
Sinembargo varios persona a constata cu e insinerado e mesun dia y dianan anterior tawata operando y hasta tin imagennan cu e insinerado ta operando mientras mester a cambia e filternan, manera nada a pasa. E insinerado tawata sacando huma preto y holor hopi fuerte. Asina aki ta proteha nos medioambiente y ta hungando cu salud di habitantenan incluyendo nos muchanan? Contstantemente ta opera e insinerado sin tene cuenta cu e condicionnan stipula den e permiso di molester y tampoco ta tene cuenta cu e veredicto di hues. Ningun autoridad ta controla kico ta pasando y mucho menos actua riba e violacionnan.
Ta incomprendibel dicon ta sigui tapa fayonan di e compania priva Caribbean Trucking Company den luga di para pa e salud di e habitantenan y medioambiente. Fuera cu e insinerado ta operando contra ley di ordenaza espacial y hues a ordena pa gobierno re-evalua e permiso di molester toch minister Arends ta keda para ariba cu te hasta sin filter por sigui laga e insinerado opera cu tur e peliger y riesgonan cu esaki ta trece cune. E minister encarga cu husticia, minister Rocco Tjon, ta e minister responsabel pa e otorgamento di permiso di molester y supervision di e Ley di Molester. Minister encarga cu infrastructura y ordenanza espacial ta Minister Evelyn Wever Croes y ta encarga cu e supervision di e ley di ordenanza espacial (LRO) y ROPV. Ta remarcabel cu ambos na nan turno ta keto riba e violacionnan implicitamente aproba door di Minister Arends.