Dia 22 di februari, 2022 a inicia e proceso pa bin cu un maneho di desperdicio pa Aruba. Como parti di un vision pa no solamente cera parkietenbos, pero tambe pa cuminsa enfoca riba reduci, reuza y recicla desperdicio, y facilita e transicion di Aruba basa riba principionan circular (economia circular).
Pa implementa e vision ta rekeri entre otro, comprension y sosten di comunidad, y colaboracion y cooperacion entre sector publico cu sector priva.
Parti di e proceso ta pa redirigi e diferente sorto di desperidicio cu ta yega dump di parkietenbos. Asina nos por cuminsa e proceso pa cera y remedia parkietenbos, y elimina e candelanan cu a plaga Aruba pa demasiado decada.
Minister Arends a informa cu dia 22 di augustus, 2022 ta cuminsa ehecuta e plan di redireccion di desperdicio. E prome tipo di desperdicio lo ta taira. Motibo pa e escogencia aki tin di haber cu e hecho cu e coleccion di taira ya caba ta basta organisa den sector comercial, y e necesidad urgente di sigura cu ningun candela tuma luga mas riba e tereno di Parkietenbos.
E mandatario a splica cu e resultado di e forum di Trash 2 Cash a identifica dos compania cu por procesa taira den forma efectivo actualmente, cual ta Ecotech y Carentra. Desde 22 di augustus 2022, tur desperdicio di taira lo mester wordo deposita na un di e dos localidad nan aki.
“Mi ta di opinion cu cooperacion ta un acto esencial pa logra un Aruba cu un maneho di desperdicio responsabel, pa nos bida marino, pa e salud di nos hendenan, y unda respet, solidaridad y accion conhunto ta presente den tur etapa di e proceso pa asina logra e meta aki”, minister Arends ta subraya.
“Ningun compania di desperdicio lo ser exclui, ni awo ni den futuro. No por permiti faboritismo ni tampoco ningun monopolio den e maneho di desperdicio”.
Hunto cu tur e partners, incluyendo DNM y BCI, nos lo organisa un reunion cu stakeholders dia 3 di augustus. “Nos ta pidi tur instancia/compania cu ta atende cu taira pa tuma contacto cu nos na [email protected].” Tambe lo tin varios campaña di consientisacion for di tur partner pa asina informa pueblo di e proceso nobo pa deshaci di desperdicio di taira, basa riba e maneho nobo.
Di parti di Gobierno di Aruba minister Ursell Arends ta gradici di antemano e cooperacion di comunidad di Aruba pa asina nos cuminsa cu separacion di desperdicio riba nos pais.
