ORANJESTAD – Arubahuis como institucion ta trahando duro pa tin su posicion fuerte bek den comunidad Hulandes. Den cuadro di esaki, lo tin un plan den cual tur trahado di Arubahuis lo tin un rol den dje, incluyendo director y Minister Plenipotenciario Interino señor Ady Thijsen. E meta ta cu como ekipo/hunto lo mester percura pa mustra cu Arubahuis tey como institucion na Hulanda semper pa nos Arubianonan y alabes cu tin un rol den comundad Hulandes, Minister Thijsen a bisa.
Minister Thijsen a splica cu desde cu el a yega Hulanda, e tabata den contacto cu diferente gremio, y a ripara cu tin e sentimento cu Arubahuis mester tin un rol fuerte y visibel, cual Minister Thijsen ta ful di acuerdo cu ne. Pues, algo hopi importante ta pa percura pa Arubahuis tin su rol bek den e comunidad Hulandes. “Si nos wak bon tur loke ta pasando rond mundo manera efecto y daño causa pa Covid, y awo tambe e guerra na Ukraina. Tur esaki tin efecto riba region Caribense, Hulanda y otro paisnan Europeo. Eynan mi ta kere cu e rol di nos ta grandi aki na Hulanda, “ Minister Thijsen a expresa.
Gobierno di Aruba y Parlamento di Aruba tin contacto cu e Gobierno y Parlamento na Hulanda, pero Arubahuis cu ta situa na Hulanda, su relacion tambe ta hopi importante. E relacion cu Arubahuis tin ta amplio esta tin contacto cu Gemeente, Provinciale Staten, Algemene Rekenkamer, Eerste kamer, Tweede kamer, Koninkrijksregerig, Europese Unie y tambe sin falta comercio cu ta hopi importante, y diferente fundacion cu tambe ta importante na Hulanda.
Por ultimo, Minister Thijsen a expresa cu tin hopi trabou pa haci, y ta bezig tambe cu e proceso pa renoba e edificio di Arubahuis. No obstante esaki, ta sinti cu ta riba e caminda corecto y cu ta bay logra varios cos den e tres añanan cu ta bay bin.