ORANJESTAD – Algun tempo atras Minister di Husticia y Asuntonan Social Rocco Tjon a bishita SPD, y ayera a invita e personal di SPD pa un reunion special, caminda a brinda un splicacion amplio di tur e desaroyonan cu tin andando riba e tematica di salud mental y adiccion.
Ta asina cu hopi bes ora ta papia di salud mental y adiccion ta pensa solamente riba respaldo, sinembargo, SPD ta hopi crucial pa cu e tematica aki tambe. A toca e tema di con ta bay surpasa e retonan den e tereno aki, a splicanan tocante e proyecto di “stichting hunto” y con esaki ta hinca den otro, cual lo consisti di un departmanto specifico pa atende cu e tematicanan aki pa mucha y hobennan. Banda di esaki, a papia tambe di e “building blocks”, pues e werkgroepen cu tin actualmente, cual ta trahando hunto pa concretisa e vision cu Aruba tin a largo plaso hunto cu PAHO.
Banda di esaki a toca tambe e parti legislativo, e parti di enseñansa, infrastructura, material, y financiamento. Pues un reunion sumamente positivo, caminda e personal mes a indica cu nan tambe ta wak e desaroyonan aki como uno positivo y a trece ideanan padilanti pa e parti di tecnologia manera software programs, cual ta algo hopi importante y un idea cu sigur lo conta cu atencion di Ministerio di Husticia y Asuntonan Social. Manera a bin ta menciona for di inicio, e personal ta para central den cada departamento, y pa e motibo aki, e ta importante tambe pa personal ta bon informa y involucra den dicho desaroyonan, y pa e motibo aki tambe nan ta forma parti di e stuurgroeop GGZ.
