ORANJESTAD – Awe mainta den Corte di Husticia a trata e caso sumario cu Claudius Philips a cuminsa contra Daury Rodriguez relaciona cu e acusacion di Rodriguez riba facebook caminda e ta haya Philips pa pedofile.
ARUBANATIVE por a compronde cu Philips cu su abogado mr. Mohamed ta haya cu inhustamente Rodriguez ta acusa Philips di pedofile.
Abogado mr. Arendsz Marchena di Rodriguez ta haya cu no por stroba Rodriguez di su libertad di expresion. Na opinion di e abogado Hues a condena Philips pa pornografia di mucha pero a bisa tambe cu Philips ta co responsabel pa abusa di mucha.
ABOGADO TA CUESTIONA ACUSACION INHUSTO
Mr. Mohamed a bisa Hues cu e caso aki ta bay riba e forma con Rodriguez ta acusa Philips di pedofile. E abogado a menciona un sentencia di Corte, caminda un persona a hay’e ta rectifica pa a yama un otro persona pa pedofile. Hues a bisa cu e conoce e sentencia ey. Mr. Mohamed a bisa Hues cu e ta haya cu ta inhusto cu net despues di fayecimento di defunto Gario, Rodriguez ta acusa Philips di pedofile. Esaki a haya masha hopi atencion y Rodriguez ta crea e impresion cu Philips ta un pedofile, cual absolutamente no ta asina.
E abogado a bisa Hues cu Philips, na 2011 a wordo condena pa pornografia di mucha. Philips a tene conferencia di prensa y a splica cu el a haci un fayo. E abogado a sigui bisa cu e palabra pedofile ta un abusador di mucha menor di edad. Rodriguez ta basa su mes riba e sentencia cu Philips lo a abusa di mucha cual no ta e caso. El a bisa Hues cu a manda carta pa Rodriguez stop y rectifica sino lo cuminsa un caso sumario. E abogado a bisa cu Rodriguez a laga sa cu e ta cla pa Corte y cu Philips tin hopi caso di pedofile y cu e tin un morto riba su nomber. El a hasta bisa cu e ta considera Philips e pedofile mas grandi na Aruba. Mr. Mohamed ta haya cu Rodriguez no tin ningun prueba. E abogado a bisa Hues cu e publicacionnan di Rodriguez riba facebook a afecta Philips y su agrupacion Oreo. A para tocamento pa evita problema. E miembronan di Oreo ta wordo pinta como simpatisante di pedofile.
Mr. Mohamed ta haya cu Rodriguez mester rectifica pasobra el a haci acusacion inhusto contra Philips.
El a bisa Hues cu Rodriguez lo a haya video di un dama cu lo ta bisa cu el a wordo abusa door di Philips pero riba video no ta mira nada cla. Mr. Mohamed ta haya cu esey no ta hustifica pa yama Philips pedofile. El a bisa cu segun e dama cu ta acusa Philips, door di publicacion di Rodriguez el a dicidi di publica esaki. Mr. Mohamed a remarca pakico e dama aki no a haci denuncia for di tempo cu esaki lo a sosode cu ta mas cu 10 aña pasa. El a bisa cu e tempo ey Philips tabata den exterior ta studiando musica. Na opinion di mr. Mohamed, e denunciante anonimo tampoco no tin validez. El a pidi Hues pa ordena Rodriguez rectifica loke el a publica na Juni 2022. Mr. Mohamed a remarca cu mira pornografia di mucha no kiermen cu bo ta un abusador sexual di mucha. El a mustra cu Rodriguez mes 20 aña pasa a wordo condena pa algo cu el a haci. E ta haya cu tur hende tin e derecho di rehabilita di loke nan a haci den pasado.
ABOGADO TA HAYA CU NO MESTER RECTIFICA
Mr. Arendsz Marchena a bisa Hues cu e pregunta cardinal den e caso ta, si mester para e libertad di expresion di un persona. E abogado ta haya cu e interes di Rodriguez ta pisa mas cu e interes Philips. El a mustra cu na 2011, Philips a wordo condena pa pornografia di mucha y a haya 4 luna di prison condicional y trabao pa comunidad. Na opinion di mr. Arendsz Marchena, den ley penal e pornografia di mucha ta cay den e categoria inmoralidad mescos cu abuso di mucha. El a bisa Hues cu ta Philips mes a download e pornografia di mucha, pues e mes a busca nan y no manera e ta pretende cu accidental el a haya nan riba su laptop. E nomber pedofile no ta nomber di abuso sexual sino un malesa mental cu mester haya tratamento. E intension di Rodriguez ta pa mustra cu Philips ta un pedofile. E ta haya cu e video di e dama cu ta denuncia Philips, no ta topico di discusion den caso pasobra e mesun dia Rodriguez a kita esaki for di facebook. Segun abogado tin dos denuncia contra Philips. Hues a pidi pa menciona nomber pero abogado a bisa cu el a papia cu mr. Mohamed y cu e caso ta mucho bieu.
Hues a remarca cu for di unda ta saca cu Philips ta co responsabel di abuso di mucha. E abogado a menciona e sentencia di 2011, caminda ta menciona esey. E abogado ta haya cu e sentencia di Philips ta haci cu Rodriguez por considera Philips como pedofile. E ta haya cu Hues mester rechaza demanda di Philips.
VIDEO DI DENUNCIA DI DAMA
Hues a pidi pa pasa e video cu Rodriguez a post. A pasa esaki den Corte caminda e dama na yoramento ta bisa cu e tabata bay cu su mama na un hotel y cu Philips lo a abusa di dje den Philips su auto. E ruman homber a haya sa y a forza e dama pa bisa nan mama. E mama no por a soporta esaki y a mata su mes. E dama ta bou tratamento di psycologo. Hues a bisa cu e dama ta papia di abuso pero el a describi con esaki a sosode? Segun mr. Arendsz Marchena cu si. Mr. Mohamed a bisa Hues cu e dama ta bisa cu Philips a mishi cun’e pero no kier bay den mas detayes. Hues a puntra Philips si e conoce e dama y Philips a desmenti categoricamente di lo tabata cu un mucha den su auto na e hotel. Hues a puntra nomber di e dama y Rodriguez a bisa e nomber.
Hues a sera tratamento di e caso y a bisa cu dia 10 Augustus 2022 lo tin sentencia.