Home Sports Exitoso competencia di Beach Volleyball entre Curacao y Aruba

Exitoso competencia di Beach Volleyball entre Curacao y Aruba

SHARE

Oranjestad: Aruba Volleyball Association tawata tin un weekend exitoso di beach volleyball cu a tuma lugar ariba e canchanan di beach na Centro Deportivo Betico Croes.
Pa e competencia aki dos Team di Curacao a bini Aruba pa midi forza contra e Teamnan di Aruba den e categoria di Cabayeros Senioren.

Banda di e categoria di Cabayeros Senioren, tawata tin competencia di beach volleyball den e categoria di Damas U-19, Cabayeros U-19 y Recreativo. E publico presente y e atletanan mes por a goza y wak bon weganan di beach volleyball.
E weganan a inicia den oranan di atardi, mirando e solo cayente cu tawata reina ariba nos isla y ya den oranan laat di atardi, e luznan a cende pa asina e competencia por a continua te den oranan di anochi, cu a crea sigur un dushi ambiente pa wak e weganan di beach volleyball.

E weganan final a tuma lugar diadomingo anochi y e scorenan ta como lo siguiente:
Categoria Recreativo e Team di Seiyeung/Anchelino/Carlos y Alvaro a bira campeon mientras cu e Team di Tristan/Ruiyuan/Chloe y Catherine a keda na di dos lugar.

Den Damas U-19 e duo di Emily/Wilesha a vence e Team di Samira/Tara 2-1.

Den Cabayeros U-19 e duo di Zevon/Jeandrey a competi pisa contra e duo di Keanu/Cristopher unda finalmente cu score masha preta e Team di Zevon/Jeandrey a bira campeon cu score di 2-1. Na di tres lugar a keda e duo Brian/Jermar cu a gana di e duo Vladimir/Akeal.

Y den e categoria Cabayeros Senioren e finale nan a bay entre Curacao y Aruba tanto pa e di tres (3) lugar como pa e campeon y subcampeon.
Pa di tres lugar e Team di Curacao Lysandro y Jursham a gana e Team di Aruba Joshua y Jorvin 2-0 den un bon wega.

Y pa di prome lugar e bataya a bay entre e Team di Curacao Gilbert y Shurendy y e Team di Aruba Eddy y Gregory. Ambos team a competi bon cu otro pero na final cu score minimo e duo di Curacao Gilbert/Shurendy a mustra nan abilidad y experiencia y a gana Aruba for di Eddy y Gregory cu e score di 2-0.

Un anochi cu a conclui hopi bunita cu entrega di medayanan na e teamnan campeon y ganador unda atletanan ya ta puntra ta ki dia e siguiente competencia ta sigi.

Aruba Volleyball Association ta gradici tur Refree y Scorers, Aruba Sport Unie y tur otro instancia cu a apoya y duna sosten na A.V.A. pa cu e competencianan aki cu tawata uno exitoso.