For di diferente fuente por a tuma nota y a scucha cu AVP a redobla e debe di pais Aruba den apenas 8 aña bou nan maneho desde 2009 pa 2017. Fuentenan manera Banco Central di Aruba (CBA) y Departamento di Finansas a registra esaki y hasta Colegio di Supervision Financiero Aruba (CAft) tambe a skirbi over esaki den nan rapportnan y awe no ta un secreto cu pais Aruba tin un situacion di debe halto como pais asina chikito.
Nos por puntra nos mes ta pakico y na ki momento Aruba a haya un CAft anto. For di tabel por tuma nota datonan di e deficit financiero y e debe di pais Aruba registra door di CBA for di 2008 pa 2021 y e financieringssaldo registra pa departamento di Finansas di 2010 pa 2021.
Aki por nota nivelnan di deficit (diferencia entre entrada y gasto) aña tras di aña nunca antes registra. Gobierno di AVP tawata surpasa su entradanan haciendo gastonan surpasando 400 miyon pa mas cu un aña. Asina den apenas 5 aña cuminsando for di 2010 te cu 2015 a crea un debe extra di 1.7 biyon florin. Esaki a haci cu na 2014 caba Hulanda a hala atencion di Gobierno di AVP y a yega na un acuerdo por medio di un protocol, e asina yama Witte Donderdag Akkoord, pa purba conscientisa y corigi Gobierno di AVP di nan mal maneho financiero. Tur esaki sin exito!
Den apenas 8 aña Gobernacion di AVP a hisa e debe di Aruba cu 2,2 biyon florin sin un situacion di crisis y den e tabel por observa over e añanan 2010 pa 2017 con e deficit a contribui na e debe aki. Mirando cu Gobierno di AVP no a atene su mes na e palabracionnan firma den e protocol y purba cuminsa maneha y reduci e debe di pais Aruba bek a haci cu Hulanda a duna Gobierno di Eman un instruccion y esaki a resulta den un Decreto Real na 2015, e asina yama KB. Aki ta unda den e instruccionnan di Hulanda mester a bin cu Colegio di Supervision Financiero (CAft) y Parlamento di Aruba na 2015 a pasa e ley di LAft (Landsverordening Aruba Financieel Toezicht) pa asina duna e autoridad na CAft pa supervisa y duna conseho na Hulanda over e maneho financiero di Aruba.
Pa colmo despues di e desaster financiero laga atras pa Gabinete Eman I y II, Aruba a wordo asota pa un crisis causa pa e Pandemia di Covid na 2020 na unda Aruba y Gobierno Wever-Croes I no tawata tin e espacio financiero ainda pa yuda su pueblo su mes, pues mester a recuri pa prome biaha den historia na asistencia financiero di Hulanda. Aruba a fia practicamente 1 biyon florin, cu ta mita di e debe di Gabinete di AVP a genera, pa sostene pueblo trahador di Aruba y nan famianan asina hunto purba surpasa un crisis cu mundo a experiencia despues di algo mas cu 100 aña.
Awe e fiansanan brinda pa Hulanda ta loke a yuda Aruba sostene y absorbe efecto di e crisis berdad pero aunke condicionnan di e fiansanan aki no ta mara na interes directamente pero si na condicionnan cu Gobierno mester atene su mes na dj’e. Awe CAft tin un rol ainda pa conseha Hulanda tocante e condicionnan stipula na e asistencianan financiero den forma di fiansa durante Pandemia.
Gobierno di MEP tin e mala suerte di Goberna cada bes den momentonan dificil y di crisis, pero ta Dios so sa dicon. Si no tawata pa AVP, awe Aruba lo no tawata tin un debe di e magnitud aki. Si no tawata pa AVP, Gobierno por a duna su pueblo asistencia probablemente sin mester a depende di otro pa ayudo. Si no tawata pa AVP, awe no tawata tin tanto condicion cu casi Gobierno di Aruba mes no tin espacio pa maneha pais Aruba. Paso si no tawata pa AVP, awe no tawata tin un CAft.