ORANJESTAD – Awe mainta Hues di Corte di Husticia di Aruba a dicta sentencia den e caso penal cu Ministerio Publico a cuminsa contra e hombernan Venezolano biba na Aruba, R.G.Z. y J.T.R.
ARUBANATIVE por a compronde cu luna pasa tratamento di e caso a tuma lugar caminda Fiscal ta haya R.G.Z. y J.T.R. culpable di falsificacion di documento y labamento di placa procedente di e 55 baranan di oro. Fiscal pa cu e castigo, a tene cuenta cu e tempo cu a transcuri. El a xigi pa G.R.Z. castigo igual na loke e tabata sera. Pa J.T.R. el a exigi 12 luna di prison di cual 6 luna ta condicional cu 2 aña di prueba.
NO A FALSIFICA DOCUMENTO
Pa loke ta e acusacion di falsificacion di documento, Hues ta haya cu e documentonan ta di Douane y no ta haya cu ta falsificacion. Tambe Hues no ta haya proba cu lo kier a sconde cu e oro ta procedente di Venezuela cu e documentonan aki. Hues a mustra cu ta via broker e documentonan ta wordo manda pa Douane caminda ta para cu e oro ta procedente di Venezuela y ta wordo exporta pa otro pais. Na Aruba G.R.Z. a bay Douane pa tuma e documentonan caminda e oro tabata tey caba.
Hues ta haya cu Douane a splica cu e yenamento di formulario ta corecto y Douane di Hulanda tambe ta yena mesun cos o sea cu na Aruba ta pone cu e oro ta procedente di Aruba y na Hulanda ta pone cu e oro ta procedente di Hulanda. Hues ta haya cu aki no por conclui cu esaki ta pa gaña y no bisa cu e oro ta procedente di Venezuela. E ta haya cu Douane no tabata corecto den su informacion riba e documentonan. Hues a declara e duo liber di falsificacion di documentonan.
NO TIN LABAMENTO DI PLACA
Pa loke ta e acusacion di labamento di placa, Hues a mustra cu e sospechosonan G.R.Z. y J.T.R. ta para riba cu via Pa Oro International nan tabata transporta e oro pa destinacion. Hues ta haya cu e solo hecho cu e oro ta di Venezuela, no corecto ta saca conclusion cu e ta procedente di delito. No tin prueba concreto cu e oro ta ilegal y mucho menos di delito. E forma con a transporta e baranan di oro, no por papia di sospecho di oro ilegal. Hues a declara e duo G.R.Z. y J.T.R. liber di e acusacionnan. Por a mira cu emocionnan tabata halto den sala di Corte y J.T.R. a cuminsa yora di contento pa tur e cosnan cu el a pasa aden.
Pa loke ta e baranan di oro, cualnan ta hinca den un caha fuete na Banco Central, Hues a bisa cu e no ta tuma un decision riba esakinan. El a bisa cu no tin indicacion, kende ta e doño di esakinan. Awor lo por spera un otro caso pa asina e compania concerni por haya e baranan di oro.