ORANJESTAD – Minister di Husticia y Asuntonan Social Rocco Tjon a bishita e warda di polis na St. Cruz, caminda hunto cu e Agentenan Policial a haya un splicacion amplio di Bossi, kende ta e compania cu a instala e camaranan na tur warda di polis. Un sistema cu tin inteligencia artificial pa ambos detecta y analisa, facilitando e trabou pa e Agentenan y alabes eleva nan siguridad.
Den cuadro di e proyecto aki, a incorpora e vigilacion di camara pa e cel complexnan, pa asina eleva e siguridad di e personal como tambe e siguridad di tur persona cu ta yega na warda di polis. Di otro banda, e camaranan ta minimalisa infraccion cu lo por tuma luga na e wardanan aki pa loke ta trata e autonan y pertenencianan entre otro. Segun e mandatario, ya caba a haci palabracionnan cu e waarnemend Korpschef esta; Sr. Croes, pa traha un manual, pa asina splica e personal, kico e maneho ta pa loke ta e diferente camaranan aki y e uzo di nan pa loke ta e imagennan aki.
Ademas di esaki, a incorpora tambe e parti di mantencion y asistencia tecnico na e proyecto, pa si algo mester sosode, e asistencia tecnico por yega pa asisti e personal de inmediatamente. Un otro aspecto hopi importante ta cu si algo mester daña, esaki lo wordo reemplasa mesora, di e forma aki ta garantisa cu e proyecto por ta uno duradero. E instalacionnan a keda cla na tur warda di polis, sinembargo a finalisa e funcionalidad por completo di warda di St. Cruz, dentro di poco lo finalisa warda di San Nicolas, sigui pa Playa, Shaba, Strandpolitie, Noord como tambe Balashi.
E camaranan cu a scoge pa e proyecto aki, ta camaranan cu ta contene e aspecto di inteligencia artificial cual ta facilita e trabou pa e Agentenan Policial. Banda di esaki por menciona tambe cu ya caba a cuminsa combersacionnan cu Alto Mando conhuntamente cu Sindicato di Polis pa asina dentro di poco cuminsa cu e proyecto piloto di Bodycams. Segun estudionan haci ambos na Merca y Europa, por conclui cu bodycams ta di balor agrega pa ambos e siguridad y e integridad di e Agentenan. Di parti di Ministerio di Husticia y Asuntonan Social a investiga e parti legislativo caba, pues lo tin un base legal pa por inicia cu e proyecto aki.
